„ვაშინგტონ პოსტი" აშშ-ს ყოფილი სენატორის და ვიცე-პრეზიდენტობის კანდიდატის, ჯოზეფ ლიბერმანის გარდაცვალების შესახებ იუწყება.
ჯოზეფ ლიბერმანი, რომელიც 1988-1994-2000-2006 წლებში კონექტუკიდან იყო არჩეული სენატორად, 2000 წელს კი დემოკრატებს ჰყავდათ წარდგენილი ვიცე-პრეზიდენტობის კანდიდატად (პირველი ებრაელი კანდიდატი წამყვანი პარტიის ეროვნლურ სიაში), 27 მარტს, ნიუ-იორკში, 82 წლის ასაკში გარდაიცვალა. ოჯახის განცხადებით, გარდაცვალების მიზეზი დაცემის შედეგად მიღებული დაზიანებების გართულება გახდა, - წერს „ვაშინგტონ პოსტი".
ჯოზეფ ლიბერმანი 2007 წლამდე დემოკრატი იყო, 2007 წლიდან 2008 წლის სექტემბრამდე პოზიციონირებდა როგორც დამოუკიდებელი კანდიდატი, მაგრამ მონაწილეობას იღებდა სენატში დემოკრატიული პარტიის ფრაქციის სხდომებში, 2008 წლის სექტემბერში რესპუბლიკური პარტიის ეროვნულ ყრილობაზე გამოსვლის და რესპუბლიკელების პრეზიდენტობის კანდიდატ ჯონ მაკ-კეინისთვის მხარდაჭერის გამოცხადების შემდეგ კი დემოკრატიული პარტიის ღონისძიებებში აღარ მონაწილეობდა.
2008 წლის საპრეზიდენტო არჩევნებში ბარაკ ობამას გამარჯვების შემდეგ დემოკრატებს, მაკ-კეინის მხარდაჭერის, უფრო ადრე კი, ერაყიდან ჯარების გამოყვანის საკითხში რესპუბლიკელების პოზიციის გაზიარების გამო, ეროვნული უსაფრთხოებისა და სამთავრობო საკითხთა კომიტეტის თავმჯდომარის პოსტიდან მისი გადაყენება სურდათ, მაგრამ ობამამ და პარტიის სხვა ლიდერებმა ჩათვალეს, რომ ასეთ შემთხვევაში იგი სრულად გაემიჯნებოდა მათ და რესპუბლიკელებში გადავიდოდა.
რესპუბლიკელ სენატორ ლინდსი გრეჰემთან ერთად ჯოზეფ ლიბერმანი 2008 წლის 20 აგვისტოს თბილისში ჩამოვიდა სოლიდარობის გამოსახატავად და ქვეყნის ხელმძღვანელობასთან მოლაპარაკების მიზნით, აშშ-სი დაბრუნების შემდეგ, 26 აგვისტოს კი მათ Wall Street Journal-ში ერთობლივ სტატია გამოაქვეყნეს და აღნიშნეს, რომ რუსეთის შესაძლო შეტევის მცდელობის მოსაგერიელებლად საჭიროა საქართველოს შეიარაღებული ძალების ჰაერსაწინააღმდეგო და ჯავშანსაწინააღმდეგო სისტემებით აღჭურვა.
2011 წლის 11 იანვარს ვაშინგტონში ვიზიტით მყოფმა საქართველოს პრეზიდენტმა მიხეილ სააკაშვილმა ავღანეთის და პაკისტანის საკითხებში აშშ-ს სპეციალური წარმომადგენლის, წინა თვეში გარდაცვლილი რიჩარდ ჰოლბრუკის ხსოვნისადმი მიძღვნილ ღონისძიებაზე რიჩარდ ჰოლბრუკის ხსოვნისადმი მიძღვნილ ღონისძიებაზე დასწრებისას განაცხადა, რომ იგი სიკვდილის შემდეგ დააჯილდოვა წმინდა გიორგის სახელობის გამარჯვების ორდენით, 13 იანვარს კი, ჯორჯტაუნის კლუბში გამართულ სადილზე და ცერემონიალზე წმინდა გიორგის გამარჯვების ორდენი ჯოზეფ ლიბერმანს გადასცა.
2012 წლის 1 ოქტომბრის არჩევნების წინ, სექტემბრის პირველ რიცხვებში, ჯოზეფ ლიბერმანი საქართველოში და ჯონ მაკკეინთან და ლინდსი გრეჰემთან ერთად ჩამოვიდა. ხელისუფლების და ოპოზიციის წარმომადგენლებთან შეხვედრების დროს მათ იმედი გამოთქვეს, რომ არჩევნები თავისუფალი და სამართლიანი იქნებოდა და მის შედეგებს ყველა აღიარებდა და დაეთანხმებოდა.
2012 წლის დეკემბრის დასაწყისში სენატორებმა ჯონ მაკ-კეინმა, ჯოზეფ ლიბერმანმა, ლინდსი გრეჰემმა, ჯინ შაჰინმა და ჯეიმს რიშიმ წერილით საქართველოს პრემიერ-მინისტრ ბიძინა ივანიშვილს მიმართეს და შეშფოთება გამოხატეს საგარეო საქმეთა მინისტრის მაია ფანჯიკიძის მიერ ინტერვიუში წინა ხელისუფლების წარმომადგენლების კრიმინალებად მოხსენიების გამო.
ჩვენ მივესალმებით თქვენ სიტყვებს, რომ გამორიცხავთ შერჩევით სამართალს, თუმცა, სამწუხაროდ, განვითარებული მოვლენები შემაშფოთებელია. ქართველ ხალხს სჭირდება, რომ თქვენ ოპოზიციასთან, პრეზიდენტთან ითანამშრომლოთ და გაუმკლავდეთ გამოწვევებს, - წერდნენ სენატორები.
2011 ბოლოს ჯოზეფ ლიბერმანმა განაცხადა, რომ სენატში კენჭს აღარ იყრიდა და 2013 წლიდან იგი იურიდიულ ფირმების უფრო კონსულტანტი გახდა. 2016 წლის არჩევნებში ჰილარი კლინტონს, 2020 წლის არჩევნებში კი ჯო ბაიდენს უჭერდა მხარს. დონალდ ტრამპი მის კანდიდატურას მის გამოძიების ფედერალური დირექტორის პოსტზე განიხილავდა. ჯოზეფ ლიბერმანი იყო ორგანიზაცია No Labels-ის ერთ-ერთი დამფუძნებელი და თავმჯდომარე, ორგანიზაციის, რომელიც მიიჩნევს, რომ ამერიკელებს არ სურთ არჩევანი ბაიდენს და ტრამპს შორის გააკეთოს და აპირებს ამომრჩევლისთვის საკუთარი კანდიდატურის შეთავაზებას.
„მე არასდროს მინახავს ასეთი დიდი განრისხება ორი დიდი პარტიის მიმართ". No Labels-ის ჯგუფი (იგულისხმება პრეზიდენტობის კანდიდატის შესარჩევი 12-კაციანი ჯგუფი - „აიპრესი") ასრულებს დაპირებას და შესაძლოა, სულ მალე დაასახელოს საკუთარი კანდიდატი, - აცხადებდა „სიენენისთვის" 14 მარტს მიცემულ ინტერვიუში ჯოზეფ ლიბერმანი.
.
