სომხეთის პრემიერ-მინისტრმა ნიკოლ ფაშინიანმა განაცხადა, რომ გასული კვირის განმავლობაში რეგიონში სამხედრო-პოლიტიკური ვითარება გაუარესდა და აზერბაიჯანი ბოლო დღეების განმავლობაში აძლიერებს სამხედრო ყოფნას არაღიარებული მთიანი ყარაბაღის სადემარკაციო ხაზისა და სომხეთის საზღვართან.
მისი თქმით, წინა დღეს მოხდა მორიგი სასაზღვრო შეტაკება, რომლის დროსაც სამი სომეხი ჯარისკაცი დაიღუპა, ლაჩინის დერეფნის ბლოკადა გრძელდება, ხოლო ბაქო აგრძელებს ერევნის დადანაშაულებას ცეცხლის შეწყვეტის პირობების დარღვევაში. ნიკოლ ფაშინიანი ამაში ხედავს სიგნალს იმისა, რომ აზერბაიჯანი ამზადებს ახალ "შეიარაღებულ პროვოკაციას მთიანი ყარაბაღისა და სომხეთის წინააღმდეგ" და მოუწოდა საერთაშორისო საზოგადოებას, რეაგირება მოახდინოს ახალი ომის თავიდან ასაცილებლად.
ფაშინიანმა დასძინა, რომ ერევანი აგრძელებს 2021-2023 წლებში ბრიუსელისა და პრაღაში შეხვედრების დროს მიღწეული შეთანხმებების მხარდაჭერას და რომ ის ყარაბაღში მცხოვრები სომხების უსაფრთხოების საკითხების გადასაჭრელად მნიშვნელოვნად მიიჩნევს ბაქო-სტეფანაკერტის დიალოგს საერთაშორისო მექანიზმის ფარგლებში და ლაჩინის დერეფნის განბლოკვას საერთაშორისო სასამართლოს გადაწყვეტილებების შესაბამისად.
"ამ ყველაფრის საფუძველზე სომხეთი მზადაა და ესწრაფვის, ხელი მოაწეროს ხელშეკრულებას მშვიდობისა და აზერბაიჯანთან ურთიერთობის რეგულირების შესახებ. ჩვენ სამშვიდობო დღის წესრიგის მომხრეები ვართ", - განაცხადა ფაშინიანმა.
