„ჩვენს უცხოელ კოლეგებს უნდა მივმართოთ, რათა იცოდნენ, რომ ეს არის საქართველოს რიგითი მოქალაქის ვიზიტი, რისი უფლებაც მას ექნება მას შემდეგაც, როცა პრეზიდენტი აღარ იქნება. ანუ მას არც სამართლებრივად და არც პოლიტიკურად არ აქვს უფლება, იქ რაიმე მოლაპარაკებები აწარმოოს“, - ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა, მედიასთან ინტერვიუში განაცხადა.
მისი თქმით, პრეზიდენტის ვიზიტი არ არის ნებადართული პარლამენტის მხრიდან, ასე რომ მას არ ექნება ოფიციალური სახე. მისი გასვლა საზღვარგარეთ ჩაითვლება საქართველოს რიგითი მოქალაქის ვიზიტად სხვა ქვეყანაში.
„სანდოობის ხარისხი საქართველოს პრეზიდენტის მიმართ პრაქტიკულად განულებულია. აქედან გამომდინარე, საქართველოს მთავრობა, რომელიც საქართველოს პარლამენტის მიერაა დანიშნული და ანგარიშვალდებულია საზოგადოების წინაშე, ბუნებრივია, ასეთ ვიზიტებზე ვერ დათანხმდებოდა.
საქართველოს პრეზიდენტმა კარგად იცის, რომ კონსტიტუციის დარღვევა არ შეიძლება და ამას მაინც აკეთებს. ეს ზუსტად ამაზე მიანიშნებს, რომ ის პატივს არ სცემს არც ქართულ საზოგადოებას და არც საქართველოს კონსტიტუციას.
რადგან მან გადაწყვიტა პირადი ვიზიტით წასვლა საზღვარგარეთ, ჩვენს უცხოელ კოლეგებს უნდა მივმართოთ, რათა იცოდნენ, რომ ეს არის საქართველოს რიგითი მოქალაქის ვიზიტი, რისი უფლებაც მას ექნება მას შემდეგაც, როცა პრეზიდენტი აღარ იქნება. ანუ მას არც სამართლებრივად და არც პოლიტიკურად არ აქვს უფლება, იქ რაიმე მოლაპარაკებები აწარმოოს.
ახლა ნამდვილად ვეღარაფერს გააფუჭებს, რადგან იქ იმყოფება, როგორც რიგითი მოქალაქე. მის სიტყვებს არავითარი მნიშვნელობა არ აქვს, რადგან ის სხვა ქვეყანაში არ იმყოფება ოფიციალური ვიზიტით.
კიდევ ერთხელ უნდა გავიხსენოთ საქართველოს პრეზიდენტის ბოლო გამოსვლა საქართველოს პარლამენტში. ეს იყო ჩვეულებრივი რადიკალური ოპოზიციის ლიდერის გამოსვლა. ამის შემდეგ კიდევ ეყო ძალები და საქართველოს მთავრობას უთხრა, რომ უნდა გლანძღო უცხოეთში და ქართველი ხალხის გადაწყვეტილების საწინააღმდეგო განცხადებები უნდა გავაკეთო, გამიშვი ვიზიტებზეო. ბუნებრივია, ამაზე თანხმობას ვერ მიიღებდა. ეს იქნება მისი, როგორც საქართველოს რიგითი მოქალაქის პირადი ვიზიტი. ამის უფლება მას 1 წლის შემდეგაც ექნება.
საქართველოს პრეზიდენტმა როგორც „პოლარიზაციის სიმბოლო“ გვარამია შეიწყალა ვითომ დეპოლარიზაციის საბაბით და ამაზე ანგარიში არ ჩაუბარებია საზოგადოებისთვის, ისე მიდიოდა კანდიდატის სტატუსის მისაღებად ევროკავშირის არაწევრ ქვეყნებში სალაპარაკოდ. ტყუილს მოკლე ფეხები აქვს!“ - განაცხადა გურამ მაჭარაშვილმა.
ცნობისთვის, სალომე ზურაბიშვილი გერმანიაში გაემგზავრა. ხოლო საქართველოს პრეზიდენტის ადმინისტრაციამ გუშინ გაავრცელა განცხადება, სადაც ნათქვამია: "31 აგვისტოს, ქალაქ ბერლინში, გერმანიის ფედერაციული რესპუბლიკის პრეზიდენტთან, ფრანკ-ვალტერ შტაინმაიერთან ვიზიტით, საქართველოს პრეზიდენტი, სალომე ზურაბიშვილი იწყებს შეხვედრებს ევროპელ ლიდერებთან, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად."
მოგვიანებით კი საქართველოს მთავრობის ადმინისტრაციამ პრეზიდენტის ადმინისტრაციის განცხადებას უპასუხა, რომ სალომე ზურაბიშვილს უარი ეთქვა წლის ბოლომდე დაგეგმილ ყველა ოფიციალურ ვიზიტზე.
"პრეზიდენტის ადმინისტრაციამ საქართველოს მთავრობას აღნიშნულ ვიზიტთან დაკავშირებით წინადადებით 2023 წლის 12 ივლისს მიმართა, რაზედაც საქართველოს მთავრობის განკარგულებით 2023 წლის 3 აგვისტოს ოფიციალურად, წერილობით ეთქვა უარი საქართველოს კონსტიტუციის შესაბამისი მუხლის თანახმად.
ასევე, პრეზიდენტს ოფიციალურად, წერილობით ეთქვა უარი 22-24 აგვისტოს უკრაინაში, 16 სექტემბერს შვეიცარიის კონფედერაციაში, 2-3 ოქტომბერს პოლონეთის რესპუბლიკაში, 4-6 ოქტომბერს ბელგიის სამეფოში, 31 ოქტომბრიდან 2 ნოემბრის ჩათვლით დანიის სამეფოში და 1-2 დეკემბერს არაბთა გაერთიანებულ საამიროებში სამუშაო ვიზიტებზე.
სალომე ზურაბიშვილს ასევე უარი ეთქვა 27-29 სექტემბერს ბულგარეთის რესპუბლიკაში, 10-12 დეკემბერს ჩეხეთის რესპუბლიკაში და 18-20 დეკემბერს ისრაელის სახელმწიფოში ოფიციალურ ვიზიტებზე.
შევახსენებთ პრეზიდენტ სალომე ზურაბიშვილს, რომ საქართველოს კონსტიტუციის 52-ე მუხლის პირველი პუნქტის "ა" ქვეპუნქტის შესაბამისად, საქართველოს პრეზიდენტი მხოლოდ საქართველოს მთავრობის თანხმობით ახორციელებს წარმომადგენლობით უფლებამოსილებებს საგარეო ურთიერთობებში, ვინაიდან კონსტიტუციის 54-ე მუხლის პირველი პუნქტის შესაბამისად, ქვეყნის საგარეო პოლიტიკის განხორციელება საქართველოს მთავრობის უფლებამოსილებაა." - ნათქვამია მთავრობის გავრცელებულ ინფორმაციაში.
