სალომე ზურაბიშვილი შეწყალების უფლებას ბოროტად იარაღივით იყენებს რომლის გასროლილ ტყვიებს ადრესატად ქართული სახელმწიფო და ქართული კანონი ჰყავს - წერს “ხალხის ძალის” წევრი თამთა მეგრელიშვილი სალომე ზურაბიშვილზე, რომელმაც 2023 წლის მარტის აქციების დროს, პოლიციელებზე თავდასხმის ფაქტზე ბრალდებული ლაზარე გრიგორიადისის შეწყალების გადაწყვეტილება მიიღო.
თამთა მეგრელიშვილი აღნიშნავს, რომ შეწყალება პრეზიდენტისათვის კონსტიტუციით მინიჭებული უფლებამოსილებაა, რომელსაც სალომე ზურაბიშვილი კრიმინალების შესაწყალებლად იყენებს.
“შეწყალება საქართველოს პრეზიდენტისათვის საქართველოს კონსტიტუციით მინიჭებული ექსკლუზიური უფლებამოსილებაა, რომელიც, როგორც წესი, გამონაკლისის სახით გამოიყენება. ეს გამონაკლისი კი სალომე ზურაბიშვილმა სწორედ კრიმინალების შესაწყალებლად უკვე არაერთხელ გამოიყენა. საქართველოს პრეზიდენტის მიერ შეწყალების უფლებამოსილების გამოყენება ჰუმანიზმის პრინციპს ეფუძნება და ამით მართლდება თუმცა , აქ გასათვალისწინებელია ასევე სახელმწიფო ინტერესიც რომელიც სალომე ზურაბიშვილს ამ შემთხვევაშიც კვლავ ყურადღების მიღმა დარჩა. მან მორიგი კრიმინალი შეიწყალა და ვფიქრობ ამ შეწყალებისას ის მიზანშეწონილობის საზღვრებს გასცდა. ყველა სამართალმცოდნემ ვიცით, რომ შეწყალების უფლების გამოყენებისას მიზანშეწონილია გათვალისწინებულ იქნეს შემდეგი გარემოებები: დანაშაულის ჩადენის მოტივი და მიზანი, დამდგარი მართლსაწინააღმდეგო შედეგი, მსჯავრდადებულის წარსული ცხოვრება, მისი ასაკი, სასჯელის მოხდის ვადა, მანამდე ნასამართლობა მძიმე ან განსაკუთრებით მძიმე დანაშაულისათვის; ქცევა დანაშაულის ჩადენის შემდეგ, განსაკუთრებით – მისი მისწრაფება აანაზღაუროს ზიანი ან შეურიგდეს დაზარალებულს; მსჯავრდადებულის მიერ დანაშაულის გაცნობიერება და მონანიება და სხვა.
ამ პირობების გათვალისწინებით ლოგიკურად ჩნდება კითხვები- პირველი - შეწყალებისას პრეზიდენტის მიერ იყო თუ არა გათვალისწინებული დანაშაულის ჩადენის მოტივი და მიზანი?! მეორე-შეწყალებისას პრეზიდენტის მიერ იყო თუ არა გათვალისწინებული დამნაშავის ქმედებით დამდგარი მართლსაწინააღმდეგო შედეგი?! მესამე-შეწყალებისას პრეზიდენტის მიერ იყო თუ არა გათვალისწინებული დანაშაულის ჩადენის შემდეგ პირის მისწრაფება აანაზღაუროს ზიანი ან შეურიგდეს დაზარალებულს?! მეოთხე- შეწყალებისას პრეზიდენტის მიერ იყო თუ არა გათვალისწინებული მსჯავრდებულის მიერ დანაშაულის გაცნობიერება და მონანიება?!
ამ კითხვებზე პასუხი არც მე და ალბათ არც საზოგადოების დიდ ნაწილს არ აქვს. გვაქვს მხოლოდ ფაქტები რომელიც ცხადყოფს, რომ სალომე ზურაბიშვილი შეწყალების უფლებას ბოროტად იარაღივით იყენებს რომლის გასროლილ ტყვიებს ადრესატად ქართული სახელმწიფო და ქართული კანონი ჰყავს.”- წერს თამთა მეგრელიშვილი Facebook-ზე.
ცნობისთვის, საქართველოს პრეზიდენტმა სალომე ზურაბიშვილმა ლაზარე გრიგორიადისი, რომელსაც დღეს თბილისის საქალაქო სასამართლოს მოსამართლე ზვიად შარაძემ 9 წლით თავისუფლების აღკვეთა შეუფარდა, შეიწყალა.
შეგახსენებთ, შსს-ს მტკიცებით ლაზარე გრიგორიადისმა ცეცხლი წაუკიდა უწყების კუთვნილ ავტომობილს, პოლიციელებს ქვები და "მოლოტოვის კოქტეილები" ესროლა და 2023 წლის 31 მარტს აღკვეთის ღონისძიების სახედ პატიმრობა შეეფარდა
1 მაისს თბილისის საქალაქო სასამართლომ ლაზარე გრიგორიადისს აღკვეთის ღონისძიების სახე არ შეუცვალა და პატიმრობაში დატოვა.
2023 წლის 25 სექტემბერს თბილისის საქალაქო სასამართლოს მოსამართლე ნინო ნაჭყებიამ, ლაზარე გრიგორიადისი, მამის, ბექა გრიგორიადისის დაჭრის საქმეზე დამნაშავედ ცნო.
მოსამართლემ ლაზარე გრიგორიადისს სისხლის სამართლის კოდექსის 11 პრიმა 120-ე მუხლით წარდგენილი ბრალდება, რაც ჯანმრთელობის განზრახ მსუბუქ დაზიანებას გულისხმობს, ოჯახის წევრის მიმართ ჩადენილი ძალადობით გადააკვალიფიცირა და მამის დაჭრაში ბრალდებულს 1 წლითა და 6 თვის ვადით თავისუფლების აღკვეთა მიუსაჯა.
