ჩანს, რომ ზემოდან გვიყურებს ზოგიერთი, რა ჰგონიათ, რომ ახალი დემოკრატია ვართ და ამიტომ მეურვეობა გვჭირდება? უნდა მიგვითითონ, სად დავსხდეთ, რა წიგნი გადავშალოთ, რომელი კანონი წავიკითხოთ? ასეთი მეურვეობითი დამოკიდებულება აქვთ საქართველოს მიმართ, ასეთი ჩვენ გვქონდა ჩვენის ისტორიის სხვადასხვა დროს, ამისკენ არ ვისწრაფვით, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
მისი თქმით, საქართველოს აქვს საკუთარი ეროვნული ინტერესები და აქვს უფლება, დაიცვას.
„რომელიმე ქვეყანას თუ აქვს თავისი ეროვნული და უსაფრთხოების ინტერესები, ჩვენც გვაქვს, თუ საფრანგეთს აქვს, ჩვენც გვაქვს, ცოტა უფრო რთულ მდგომარეობაში ვართ ჩვენ. საფრანგეთი და ევროკავშირის სხვა ქვეყნები არიან დაცული ევროკავშირით, ზოგიერთი არის ნატო-ს წევრი და ნატო-ს ატომური ქოლგით არიან დაცულები. ჩვენ მარტო ვართ. არავინ გვიცავს. კაციშვილი თითს თითზე არ დაადებს აქ თუ რამე დაიწყო. არავინ ჩვენს ომს არ იომებს ამ ქვეყანაში. ჩვენთან ბოროტ გავლენებს არავინ შეამცირებს ჩვენს ნაცვლად. ამიტომ, ქართველი ხალხის უსაფრთხოების გამოწვევები ყველაზე კარგად იცის ქართველმა ხალხმა და როგორ უნდა ვუპასუხოთ ამ გამოწვევებს, ყველაზე კარგად იცის ქართველმა ხალხმა. თუ ფრანგს აქვს ეროვნული ინტერესები, ქართველსაც აქვს, თუ ინგლისელს აქვს, ქართველსაც აქვს და თუ ევროკავშირს აქვს ეროვნული ინტერესები, ჩვენც გვაქვს და ყველამ კეთილი ინებოს, პატივი სცეს ქართველი ხალხის დამოუკიდებლობას, თავად იზრუნოს ეროვნული ინტერესების შესრულების გზებზე“, – განაცხადა შალვა პაპუაშვილმა.
