"ჩვენ ამ პროცესს იმედიანად ვუყურებთ, რომ უკრაინაში ომი მალე დასრულდება, ოღონდ ეს არ არის ერთი და ორი კვირის ამბავი, თუმცა, იმედი გვაქვს ზაფხულისთვის ომის დასრულების კონტურები გამოკვეთილი იქნება და შეიძლება ვისაუბროთ იმაზეც, რომ ცეცხლის შეწყვეტის შეთანხმებაც იყოს ხელმოწერილი",- განაცხადა პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ გადაცემაში "ღამის კურიერი".
მისივე განცხადებით, ის მსოფლიო წესრიგი, რომელიც არსებობდა ბოლო 35 წლის განმავლობაში, ძალიან დიდი ალბათობით, რამდენიმე წელიწადში უკვე აღარ იარსებებს.
"თუმცა ეს არ ნიშნავს იმას, რომ ცეცხლის შეწყვეტით ეს პრობლემა, რაც არსებობს, დასრულდება ზაფხულისთვის. ეს არის საკმაოდ გრძელვადიანი პროცესი იქიდან გამომდინარე, რომ ჩვენ მოწმენი ვართ ცივი ომის დასრულების შემდეგ არსებული წესრიგის სრულიად გადახალისებისა და ის მსოფლიო წესრიგი, რომელიც არსებობდა ბოლო 35 წლის განმავლობაში, ძალიან დიდი ალბათობით, რამდენიმე წელიწადში უკვე აღარ იარსებებს. აღარ იარსებებს იმიტომ, რომ გამოჩნდნენ სხვა მოთამაშეებიც. ამერიკა ვეღარ იქნება ერთპოლუსიანი სამყაროს ლიდერი და შესაბამისად მსოფლიოში გაჩნდება მრავალი სხვადასხვა პოლუსი და ამ შემთხვევაში მნიშვნელოვანია, რომ ამ პოლუსებს შორის დაპირისპირება რაც შეიძლება ნაკლები იყოს", - განაცხადა ნიკოლოზ სამხარაძემ.
