ჩვენ დღევანდელ სიტუაციაში გვაქვს ასეთი მოცემულობა, რომ მიუხედავად იმისა, რომ 89 მანდატი გააჩნია “ქართულ ოცნებას”, ქაღალდზე 101 დეპუტატი არსებობს. საკითხი ეხება პარტია “გახარია საქართველოსთვის”. აქ ჩნდება საკმაოდ სერიოზული კითხვა ფარული ლეგიტიმაციის და ფარული ხელშეწყობის იმ ძალისთვის, რომელსაც “ქართული ოცნება” ჰქვია, ჩემთვის ეს არის რუსული ხელისუფლება საქართველოში, რომელიც ქვეყანას მიათრევს დამპყრობლისკენ, რუსეთისკენ, ისეთი რეჟიმისკენ, როგორიც არის ირანი, კომუნისტური პარტიის ჩინეთი და იზოლირებულს ხდის ქვეყანას ევროპისგან, იმ სივრცისგან, რომელსაც ეკუთვნის ქართველი ხალხი" - ამის შესახებ "ლელოს" ლიდერმა მამუკა ხაზარაძემ ბრიფინგზე განაცხადა.
"ამიტომ, საბოლოო გამარჯვებას რომ მივაღწიოთ ამ მიმართულებით , რა თქმა უნდა ბრძოლა გრძელდება ყველა მიმართულებით, საერთაშორისო ფრონტზეც, ქუჩაშიც, მაგრამ საპარლამენტო ფრონტზე მნიშვნელოვანია, რომ პარტიამ "გახარია საქართველოსთვის" მიიღოს გადაწყვეტილება, დროის გაწელვა იმუნიტეტის გამო, დაფინანსების გამო, არის აბსოლუტურად არარელევანტური, არაობიექტური, არასამართლიანი ამ ბრძოლაში. მათ უნდა მიიღონ ძალიან სწრაფად გადაწყვეტილება. არანაირი სურვილი არ მაქვს ვინმეს მივუთითო როგორ იცხოვროს, არჩევანი მათზეა, მაგრამ ამ ბრძოლაში მყოფმა ადამიანებმა, ჩვენ, კოალიცია "ძლიერმა საქართველომ", უნდა ვიცოდეთ ვინ არის ჩვენი პარტნიორი და როგორი ბრძოლა უნდა გავაგრძელოთ ქვეყნის თავისუფლებისათვის, ამიტომ, დარჩენა ამ პარლამენტში ბიძინა ივანიშვილის რუსულ ხელისუფლებასთან ნიშნავს რუსული საქმის და ბიძინა ივანიშვილის საქმის კეთებას, რომელიც არ არის ქართული საქმე.
ჩემი მოწოდებაა, დროზე დავასრულოთ ეს საპარლამენტო ამბავი, დავტოვოთ 89 მანდატით რუსული ხელისუფლება, რომ ძალიან სწრაფად მივაღწიოთ ახალ არჩევნებს და რაც ყველაზე მთავარია, გავათავისუფლოთ ჩვენი პატიმრები." - განაცხადა მამუკა ხაზარაძემ.
შეგახსენებთ, "გახარია - საქართველოსთვის" წარმომადგენელმა ბერდია სიჭინავამ განაცხადა: ჩვენს პარტიას მამუკა ხაზარაძის წინაშე არ აქვს რაიმე ტიპის ვალდებულება - ბანერებზე გამოკიდება ვერ წარმომიდგენია, რომ სერიოზული პოლიტიკაა
ცნობისთვის, 5 თებერვალს პარლამენტმა 2024 წლის 26 ოქტომბრის საპარლამენტპ არჩევნებში ბარიერგადალახული 4 ოპოზიციური გაერთიანებიდან სამი პოლიტიკური გაერთიანების წევრ 49 დეპუტატს უფლებამოსილება ვადამდე შეუწყვიტა.
მათ შორია არ არიან "გახარია - საქართველოსთვის" წარმომადგენლები, რომლებიც ჯერჯერობით საკანონმდებლო ორგანოში დეპუტატის მანდატს ინარჩუნებენ.
რაზედაც ლელოს ლიდერმა მამუკა ხაზარაძემ დაწერა: "რჩები პარლამენტში?! - ხარ ბიძინას რუსული პროექტი!"
