მე ჩამოვედი, რადგან აშშ დიდად აფასებს ჩვენს ურთიერთობებს საქართველოსთან. ჩვენ განვიხილავთ ამას როგორც სტრატეგიულ პარტნიორობას, – ამის შესახებ ევროპისა და ევრაზიის საკითხებში აშშ-ის სახელმწიფო მდივნის თანაშემწემ, ჯიმ ო’ბრაიენმა პრესკონფერენციაზე განაცხადა.
„გულწრფელად ვამბობ, აქ პარლამენტში ზოგიერთმა ბოლო განცხადებამ და ქმედებამ დაგვაფიქრა, იზიარებს თუ არა სტრატეგიულ ინტერესებს მთავრობაც. ჩვენ საქართველოსთან ხანგრძლივი პარტნიორობა გვაქვს. 1992 წლიდან აშშ-მა დახარჯა ექვს მილიარდზე მეტი დახმარების სახით, ჩვენ მუდმივად ვუჭერდით მხარს საქართველოს მმართველი ინსტიტუტების განვითარებას, მათ შორის შეიარაღებული ძალების, სამთავრობო და მარეგულირებელი უწყებების, თავისუფალი და სამართლიანი არჩევნების.
30 წელზე მეტია, აშშ საქართველოს ძლიერი პარტნიორია და იმედი გვაქვს, ამ პარტნიორობას გავაგრძელებთ. ჩვენ განსაკუთრებულად ვაფასებთ ამ ურთიერთობებს მას შემდეგ, რაც საქართველომ გადაწყვიტა, უფრო დაუახლოვდეს ევროპულ და ევროატლანტიკურ ინსტიტუტებს. მე ვიცი, რომ „ქართული ოცნების“ მთავრობამ საქართველოს კონსტიტუციაში ჩაწერა ევროპისა და ტრანსატლანტიკური ურთიერთობებისკენ სვლის ვალდებულება. ჩვენ ვამაყობდით, რომ მხარს ვუჭერდით საქართველოს მისწრაფებებს ევროკავშირის კანდიდატობისკენ. ჩვენ განვაგრძობთ მუშაობას საქართველოს პროგრესზე ევროკავშირისკენ და ნატო-სკენ გზაზე.
როდესაც აქ ჩამოვედი, ცოტა დამაბნეველი იყო სხვადასხვა სახის საუბარი. კანონის ზოგიერთი დამცველი ამბობს, რომ დაფინანსების გამჭვირვალობა უნდა იყოს საქართველოს მთავარი ეროვნული ინტერესი. ისინი ფიქრობენ, რომ ზოგიერთი დასავლური დამფინანსებელი არ არის ისეთი გამჭვირვალე, როგორიც უნდა იყოს. ჩვენი ინტერესია, ვნახოთ, რომ საქართველო თანხვედრაშია ევროკავშირისა და ტრანსატლანტიკურ ნორმებთან ისეთი საკითხების მოგვარებისას, როგორიცაა გამჭვირვალობა. გულწრფელად ვფიქრობთ, რომ არც პროცესი და არც კანონი არ შეესაბამება ამ სტანდარტებს. ვიმედოვნებთ, გვექნება მეტი დისკუსია, რათა გამჭვირვალობასთან დაკავშირებული ნაბიჯები შეესაბამებოდეს ევროპულ ნორმებს. ჩვენ დაგვპირდნენ, რომ ამის შესაძლებლობა იქნებოდა კანონის ამოქმედებამდე. ძალიან მკაფიოდ განვაცხადე, რომ იქნებოდა შედეგები, თუკი კანონი განხორციელდება მისი ახლანდელი სახით“, – განაცხადა ევროპისა და ევრაზიის საკითხებში აშშ-ის სახელმწიფო მდივნის თანაშემწემ.
ამასთან, როგორც ჯიმ ო’ბრაიენმა აღნიშნა, საქართველო ცდილობს ევროკავშირსა და ნატო-ში გაწევრიანებას.
„ამ ორგანიზაციებს აქვთ გარკვეული სტანდარტები, რომლებიც ამბობს, როგორია წესები. ჩვენ გვსურს, საქართველომ გააგრძელოს ამ სტანდარტებთან შესაბამისობაში ყოფნა, დაშორების ნაცვლად. საქართველოს გადაწყვეტილება, არ დაუახლოვდეს ევროპას, იქნება საქართველოს კონსტიტუციით გათვალისწინებული გზის უარყოფა. გვჯერა, ჩვენ ვხედავთ ამას გამოკითხვების შედეგებში, ვხედავთ ამას ქუჩაში, გვესმის ყველა პოლიტიკური პარტიისგან, მათ შორის „ქართული ოცნებისგან“, „ქართული ოცნების“ მხარდამჭერებისგან, ბიზნეს-საზოგადოებისგან, რომ ქართველ ხალხს ძალიან სურს ამ გზის გაგრძელება. ჩვენ ვიდგებით მათ გვერდით, როგორც ამას 30 წელზე მეტია, ვაკეთებდით“, – განაცხადა ჯიმ ო’ბრაიენმა.
