ყოფილი ელჩები სპეკულაციებს ნუ აჰყვებიან. ისინი უნდა იყვნენ ქვეყნის მეგობრები და არა რომელიმე რადიკალის. მოვუწოდებ ყველას, პატივი სცენ ამ ქვეყანას, – ამის შესახებ "ქართული ოცნების" დეპუტატმა ირაკლი ზარქუამ ჟურნალისტებთან დასმული კითხვის საპასუხოდ განაცხადა, რომელიც ეხება უილიამ კორტნის, იან კელის, რიჩარდ მაილსის, ჯონ ტეფტისა და კენეტ იალოვიცის ერთობლივ განცხადებას, სადაც ისინი საქართველოს მთავრობას მოუწოდებენ, უზრუნველყოს სააკაშვილისთვის საჭირო ზრუნვა.
ირაკლი ზარქუას თქმით, სააკაშვილთან დაკავშირებით სპეკულაციებს წერტილი დაუსვა სტრასბურგის სასამართლოს გადაწყვეტილებამ.
„განცდა მაქვს, რომ ყოფილი ელჩების ნაწილის განცხადება ლობისტური კამპანიის შემადგენელი ნაწილია და გადაეცით, დააგვიანდათ. ამ სპეკულაციას წერტილი დაუსვა სტრასბურგის სასამართლოს გადაწყვეტილებამ, რომლითაც ითქვა, რომ არა თუ სააკაშვილის ქვეყნიდან გაყვანის საფუძველი, არამედ კლინიკიდან კლინიკაში გადაყვანის საფუძველიც არ არსებობს. გერმანიის კლინიკამ კი „კონტროლკა დაასვა“, როცა ითქვა, რომ არც მოწამლულია და არც ვაწამებდით. ეტყობა, ყოფილ ელჩებს გვიან მიუვიდათ ეს წერილი, ამიტომ სპეკულაციებს ნუ აჰყვებიან. ისინი ქვეყნის მეგობრები უნდა იყვნენ და არა ერთი რომელიმე რადიკალის მეგობრები. რაც არ უნდა ინტერესები ჰქონდეთ მასთან მიმართებით, ყველას მოვუწოდებ, პატივი სცენ ამ ქვეყანას. ეს სამართლებრივი სახელმწიფოა, რომელიც იმართება კანონებით, კონსტიტუციით და პატივი სცენ სტრასბურგის სასამართლოს გადაწყვეტილებას, სადაც შავით თეთრზე წერია, რომ არანაირ წამებას, პატიმარ სააკაშვილის უფლებების შელახვას ადგილი არ ჰქონია და კლინიკიდან კლინიკაში გადაყვანის საფუძველიც არ არსებობს“, – განაცხადა ირაკლი ზარქუამ.
