დიპლომატიური პასპორტების მფლობელებს, აქვთ ასევე ჩვეულებრივი პასპორტები, ისინი შეუფერხებლად გადაადგილდებიან ევროპაში - უბრალოდ, უხეში ჟესტით უნდოდათ თავის გამოჩენა ბიუროკრატიის წარმომადგენლებს, - ამის შესახებ საქართველოს პრემიერ-მინისტრმა ირაკლი კობახიძემ გადაცემა „იმედი LIVE“-ში განაცხადა.
„ბრიუსელის ბიუროკრატია არის უმძიმეს მდგომარეობაში, აბსოლუტურად დაკარგული აქვთ სუვერენიტეტი, ასეთ პირობებში იღებენ ისინი აბსურდულ გადაწყვეტილებებს, რაც არის თავიდან ბოლომდე კონტრპროდუქტიული ბიუროკრატიისთვის. ესეც არის აბსოლუტურად ღიმილისმომგვრელი. ეს არის არსებითად სიმბოლური გადაწყვეტილება, ეს აღინიშნა კიდეც კონკრეტული ადამიანების მხრიდან, გამომდინარე იქიდან, რომ დიპლომატიური პასპორტების მფლობელებს, მაგალითად, იგივე ჩვენს საჯარო მოსამსახურეებს, აქვთ ასევე ჩვეულებრივი პასპორტები, ისინი შეუფერხებლად გადაადგილდებიან ევროპაში, უბრალოდ, უხეში ჟესტით უნდოდათ თავის გამოჩენა ბიუროკრატიის წარმომადგენლებს. ამასაც განსაკუთრებული დატვირთვა არ აქვს, არც პრაქტიკული კუთხით არ გვაფერხებს, არც სიმბოლური კუთხით, არავითარი ნეგატიური დატვირთვა ამას არ აქვს, პირიქით. ეს არის სირცხვილი ევროპული ბიუროკრატიისთვის“, - განაცხადა პრემიერმა.
