მეუხერხულება, რომ მიწევს ლაპარაკი, არ ვარ სამშობლოს მოღალატე. თუ ვინმემ ასე გაიგო, ბოდიშს ვუხდი, ვინც ამ პროპაგანდის მსხვერპლი გახდა, ვინც წამოეგო რუსულ პროპაგანდას, ვინც არ ნახა ჩემი ინტერვიუ და ემოციები გამოიწვია ამან მასში, – ამის შესახებ „ნაციონალური მოძრაობის“ წევრმა, გიორგი ბარამიძემ სასამართლო პროცესზე განაცხადა.
მისი თქმით, მის წინააღმდეგ ჭორაობის დონეზე აღძრულია ბინძური საქმე და პროკურატურა რუსი ოლიგარქის დავალებებს ასრულებს.
„პირველ რიგში, აუცილებელია, აღვნიშნო, ეს პროცესი განპირობებულია იმით, რომ საქართველო ხელში აქვს ჩაგდებული იმ რუს ოლიგარქს, რომელიც მე როცა აფხაზეთში ვიბრძოდი რუსების წინააღმდეგ – როგორ ვიბრძოდი, თუ არ ვიბრძოდი, მაგას არ აქვს ამ შემთხვევაში მნიშვნელობა, ეს უამრავმა ადამიანმა იცის, მიუხედავად იმისა, რომ აქ ზოგიერთი ადამიანი, რომელთანაც შეხება არ მქონია, მსჯელობს, მე ამდენჯერ ვიყავი, თუ იმდენჯერ ვიყავი, რატომ უნდა სცოდნოდათ მათ ეს, გაუგებარია – მე როცა აფხაზეთში ვიბრძოდი რუსების წინააღმდეგ, ის რუსებთან ერთად მილიონებს აკეთებდა. ამ ადამიანის შურისძიება არის როგორც საქართველოს, ისე ჩემ მიმართ, რადგან მას ასეთი ადამიანები ეზიზღება, რადგან ხელი ეშლება იმ დავალების შესრულებაში, რა დავალებაც აქვს მიღებული პუტინისგან, რომ ეს ქვეყანა დაუმორჩილოს რუსეთს, სწორედ ოკუპირებული ტერიტორიები გადააბაროს და მთელი საქართველოც გადააბაროს რუსეთს. ეს არის კონტექსტი ყველაფერ იმისა, რაც დღეს ხდება. ქვეყანას მძინარე ცხინვალის დაბომბვას აბრალებდნენ და ფარცხალაძე-ივანოვის სახელობის პროკურატურას არ უჩნდება არანაირი სურვილი რეაგირებისა, რომ როგორ, ეს საქართველოს არ აზარალებს? არ აზიანებს მის რეპუტაციას, მის საერთაშორისო პრესტიჟს? არცერთხელ აზრადაც არ გაჩენილა ამდაგვარი რამ, ერთხელაც არ წამოსცდენია სიტყვა პროკურატურას. რატომ? იმიტომ, რომ ეს არის ფარცხალაძე-ივანოვის პროკურატურა. ამ პროკურატურაში არ იცავენ ეროვნულ ინტერესებს, არამედ ამ პროკურატურაში ასრულებენ სწორედ რუსი ოლიგარქის დავალებებს.
სიტყვა ხვრეტდნენ იწვევს ასოციაციას და არ უნდა მეთქვა ეს, უფრო ფრთხილი უნდა ვყოფილიყავი. გავიზიარე ეს კრიტიკა, მაგრამ არანაირად არ მითქვამს ის აზრი, რომლის მოწერასაც ცდილობენ. დასაწყისში ვთქვი, რომ ტყვეები არ გვყავდა. თუ ტყვე არ გვყავდა, ვერც ვერავის ვერ მიაყენებ კედელთან. შესაბამისად, ვერც ვერავის ვერ დახვრეტ ამ გაგებით. ბრძოლაში იბრძოდნენ ჩვენები.
მეუხერხულება, რომ მიწევს იმაზე ლაპარაკი, არ ვარ სამშობლოს მოღალატე. თუ ვინმემ ასე გაიგო, ბოდიშს ვუხდი, ვინც ამ პროპაგანდის მსხვერპლი გახდა, ვინც წამოეგო ამ რუსულ პროპაგანდას, ვინც არ ნახა ჩემი ინტერვიუ და ემოციები გამოიწვია ამან მასში. თურმე მე დავადანაშაულე ჩვენი ხალხი, ჩვენი ჯარი“, – განაცხადა გიორგი ბარამიძემ.
მისი თქმით, არსად არ აპირებდა და არ აპირებს გაქცევას, არც არანაირი ობიექტური საშუალება არ აქვს, ვინმეზე მოახდინოს ზეგავლენა, შესაბამისად, ეთანხმება ადვოკატების მოთხოვნას, რომ აღკვეთის ღონისძიებად პატიმრობა არ შეფარდებოდა.
„რატომ არ გაგჩენიათ არცერთს სურვილი, როდესაც ეს რეჟიმი სამშობლოს ადანაშაულებს ომის დაწყებაში, რამე გეთქვათ, როდესაც ეს რეჟიმი სამშობლოს ადანაშაულებს მძინარე ცხინვალის დაბომბვაში, რამე გეთქვათ, როდესაც ეს რეჟიმი და მისი მთავარი ოლიგარქი და დიქტატორი ლაპარაკობს, რომ ბოდიში გვაქვს მოსახდელი, რამე გეთქვათ და საერთაშორისო ავტორიტეტზე და პრესტიჟზე მაშინ გაგხსენებოდათ რამე. მაგრამ არა, თქვენ გახსენდებათ მაშინ, როცა გკარნახობენ, რომ ნაბიჯები გადადგათ იმ ადამიანების წინააღმდეგ, ვინც მთელი თავისი შეგნებით ემსახურებოდნენ ქვეყანას, ემსახურებიან ქვეყანას, მზად იყვნენ და მზად არიან, სამშობლოსთვის თავი გაწირონ. მე ვამაყობ, რომ ამ ადამიანების რიგებში ვარ. ვამაყობ, რომ ერთი რიგითი ადამიანი ვიყავი, ვინც აფხაზეთში იბრძოდა ჩვენი მტრის წინააღმდეგ. ვინც უკრაინაში ჩვენს ბიჭებთან ერთად იყო, როდესაც კიევს ჰქონდა საფრთხე და მომდგარი იყო მტერი კიევთან.
ვიზიარებ, რაც თქვეს ჩემმა ადვოკატებმა აღკვეთთან დაკავშირებით. მე ისედაც გაქცევას არსად არ ვაპირებდი. აქამდე რომ არ ვიყავი დაჭერილი, ცოტა მეუხერხულებოდა კიდეც. აქამდე რომ არ ვიყავი იმ ადამიანების გვერდით, ცოტა მეუხერხულებოდა და მიკვირდა კიდეც. გამოძებნეს ახლა რაღაცა ბოდვა.
მე არსად გაქცევას არ ვაპირებ, პრინციპულად. მთელი ეს ერთი თვეა, გრძელდება კამპანია ჩემ წინააღმდეგ, ეს რუსული პროპაგანდა. არ შემეძლო, გადავსულიყავი თურქეთში ან სხვაგან და გავცლოდი აქაურობას? ვთქვი კიდეც, რომ პროკურატურაში არ მივალ, მივალ სასამართლოში. არც არანაირი ობიექტური საშუალება არ მაქვს, რომ ვინმეზე ზეგავლენა მოვახდინო, რა ზეგავლენა უნდა მოვახდინო, როგორ უნდა მოვახდინო ზეგავლენა, უკვე მომხდარ ჩემს ინტერვიუზეა საუბარი ხომ? ფაქტს ხომ ვერავინ შეცვლის?“, – განაცხადა გიორგი ბარამიძემ.
საქართველოს პროკურატურამ „ნაციონალური მოძრაობის“ ერთ-ერთი ლიდერი, შინაგან საქმეთა და თავდაცვის ყოფილი მინისტრი (2003-2004 წწ) გიორგი ბარამიძე სამშობლოს ღალატის, კერძოდ, საბოტაჟის ბრალდებით, სასამართლოს განჩინების საფუძველზე დააკავა. ბრალდება 4-წლამდე პატიმრობას ითვალისწინებს. როგორც პროკურატურის განცხადებაშია აღნიშნული, მიმდინარე წლის ივლისში იაგო ხვიჩიას საავტორო გადაცემაში – „საქართველოს დაბადება“ – ბარამიძემ განაცხადა, რომ 1992-1993 წლების აფხაზეთის შეიარაღებული კონფლიქტის საწყის ეტაპზე ქართული შეიარაღებული ძალების წარმომადგენლებს ტყვეები არ აჰყავდათ და მათ ადგილზე ხვრეტდნენ, რითაც საქართველოს შეიარაღებულ ძალებს ბრალი დასდო საერთაშორისო ჰუმანიტარული სამართლის ნორმების დარღვევასა და ომის მძიმე დანაშაულების ჩადენაში.
