„გამჭვირვალობის შესახებ კანონი ქართულია, დაიწერა საქართველოში და ემსახურება ქართულ სახელმწიფოს,“ - განაცხადა პარტია „ხალხის ძალის“ საერთაშორისო ურთიერთობების მდივანმა, დეპუტატმა ეკა სეფაშვილმა პარლამენტის პლენარულ სხდომაზე.
მისივე თქმით, რადიკალურ ოპოზიციას ყველაზე მეტად ეშინია იმის, რომ ხალხმა არ წაიკითხოს და არ გაიგოს გამჭვირვალობის შესახებ კანონის შინაარსი, რადგან ინფორმირებული ხალხი მომავალ არჩევნებზე მათ მხარს აღარ დაუჭერენ. „არასამთავრობო ორგანიზაციების დაფინანსების მიზნობრიობის შედეგებს შეაფასებს ხალხი, როდესაც წაიკითხავს დეკლარაციაში არსებულ ინფორმაციას,“ - აღნიშნა მან.
„მეორე დღეა პარლამენტში ინტენსიური დებატები იმართება გამჭვირვალობის კანონის შესახებ, რომელიც არასამთავრობო ორგანიზაციების ფინანსური წყაროების დეკლარირებას ემსახურება და ქვეყნის უსაფრთხოების დაცვა უნდა უზრუნველყოს.
ამ ორი დღის განმავლობაში, არ მოგვისმენია არცერთი არგუმენტი და ფაქტი, თუ რატომ არ უნდა მივიღოთ ეს კანონი. ერთადერთი, რაც გვესმის ეს არის დეზინფორმაცია, ტყუილზე დაფუძნებული მანიპულაცია ან ზღვარს გადასული დემაგოგია.
ორი დღეა ინტენსიურად ისმის - არა რუსულ კანონს! დიახ, არა რუსულ კანონს! ქართული პარლამენტი რუსულ კანონს არ მიიღებს! ეს კარგად შეიგნეთ და დაიმახსოვრეთ.
ბოლო-ბოლო წაიკითხეთ ქართული კანონი გამჭვირვალობის შესახებ და გაიაზრეთ რა წერია. გიჭირავთ ხელში რუსული კანონი, რომელიც 27 გვერდია, არც წაკითხვა გეზარებათ, არც დაზეპირება და ამონაწერებსაც აკეთებთ. რას კითხულობთ ამ რუსულ კანონს? წაიკითხეთ ევრო დირექტივა თუ მაინცდამაინც ვინმეს შედარებისთვის გინდათ. რუსული კანონის გარდა არაფერს კითხულობთ? მე არ წამიკითხავს ეგ თქვენი რუსული კანონი და არც წავიკითხავ, არ მაინტერესებს, თქვენგან განსხვავებით. ყველაფერი რუსული თქვენ მოგწონთ და მთელი თქვენი მოღვაწეობის განმავლობაში რუსულ საქმეს აკეთებთ.
ერთი წელია უკვე მოუწოდებთ ყველას არ წაიკითხოთ ქართული კანონი, არ შეხვიდეთ შინაარსშიო. რატომ გეშინიათ ასე ამ კანონის შინაარსის გაგების. მე გეტყვით, რატომაც გეშინიათ. იმიტომ, რომ როდესაც შინაარს გაიგებს ხალხი, მხვდება, რომ სწორედაც ჩვენი კანონი ემსახურება ხალხის ინტერესების დაცვას და არაფერი აკავშირებს თქვენს მოგონილ დემაგოგიასთან და ილუზიებთან.
გეშინიათ, რომ ხალხი გაიგებს სიმართლეს და სამართლიანად გეშინიათ იმიტომ, რომ როცა ეს მოხდება, აღარ გეყოლებათ მხარდამჭერები. თავისი შინაარსით ჩვენი კანონი არის სავსებით ნეიტრალური. არასამთავრობო ორგანიზაციების დაფინანსების მიზნობრიობის შედეგებს შეაფასებს ხალხი, როდესაც წაიკითხავს დეკლარაციაში არსებულ ინფორმაციას. თქვენ სწორედ ამ ინფორმირებული ხალხის გეშინიათ. გეშინიათ, რომ ინფორმირებული ხალხი არჩევნებზე მხარს არ დაგიჭერთ და ახლა რომ 12%-ანი რეიტინგი გაქვთ, ამასაც ვერ შეინარჩუნებთ ოქტომბერში დაგეგმილ არჩევნებისთვის.
რაც შეეხება მოწოდებებს, რატომ არ ვიზიარებთ ჩვენი უცხოელი პარტნიორების მოსაზრებებს, რომლებიც, გვეუბნებიან, რომ არ უნდა მივიღოთ ქართული კანონი, ამის პასუხად ბატონმა პრემიერმა შესთავაზა ელჩებს და ყველა დაინტერესებულ უცხოელ პარტნიორს ღია დებატები, რომ საჯაროდ და ყველას გასაგონად მოვისმინოთ ის შეშფოთება, რაც მართლა აწუხებს ჩვენს პარტნიორებს და ასევე ყველამ მოისმინოს, ჩვენი მხარის პასუხები, თუ რა დგას ამ გამჭვირვალობის შესახებ კანონის უკან, რომელიც ქართულია, დაიწერა საქართველოში და ემსახურება ქართულ სახელმწიფოს,“ - განაცხადა ეკა სეფაშვილმა.
შეგახსენებთ, გუშინ, დეპუტატი ალეკო ელისაშვილი იურიდიულ საკითხთა კომიტეტის სხდომაზე უმრავლესობის ლიდერს მამუკა მდინარაძეს ფიზიკურად დაუპირისპირდა. - "ამოვიდა ყელში ერთი, მივეცი ცხვირ-პირში რუსის აგენტ მდინარაძეს და გამიგდეს ფეხქვეშ!"
2024 წლის 9 აპრილს "კი ევროპას! არა რუსულ კანონს!" - თბილისში მსვლელობა დაიწყო
გერმანიაში პრემიერმინისტრი ირაკლი კობახიძე და გერმანიის კანცლერი ოლაფ შოლცი შეხვედრა გაიმართა. სადაც ოლაფ შოლცმა განაცხადა: დიდი იმედი გვაქვს, რომ "უცხოური გავლენის გამჭვირვალობის შესახებ" კანონს არ მიიღებს საქართველო და პარლამენტი გაითვალისწინებს ჩვენს და საქართველოს მოსახლეობის კრიტიკულ პოზიციას
საქართველოს პრემიერმინისტმა ირაკლი კობახიძემ კი განაცხადა: ყველას მოვუწოდებ, წაიკითხონ "უცხოური გავლენის გამჭვირვალობის შესახებ"კანონი და გვითხრან, კონკრეტულად რა არ მოსწონთ - ღია ვართ დისკუსიისთვის
2024 წლის 14 აპრილს, საქართველოს პრემიერმინისტრმა, ირაკლი კობახიძემ გაავრცელა განცხადება, სადაც ნათქვამია: ვთავაზობ ამერიკის შეერთებული შტატების, ევროკავშირის და ევროკავშირის წევრი ქვეყნების ელჩებს, გავმართოთ საჯარო დისკუსია „უცხოური გავლენის გამჭვირვალობის შესახებ“ კანონპროექტის შესახებ
