უკრაინის პრეზიდენტმა ვოლოდიმირ ზელენსკიმ, ნოემბერში უკრაინის, რუსეთისა და აშშ-ის შესაძლო სამმხრივი მოლაპარაკებების წინ განაცხადა, რომ ტერიტორიების საკითხი მხოლოდ სახელმწიფოთა ლიდერების დონეზე შეიძლება გადაწყდეს, ხოლო არმიის რაოდენობის შეზღუდვა და უკრაინის ნეიტრალიტეტი საერთოდ არ ექვემდებარება განხილვას.
"ჩვენი უსაფრთხოების გარანტიები - ეს ჩვენი უსაფრთხოების გარანტიებია. ისინი არ შეიძლება უკარნახოს რუსულმა მხარემ", - თქვა ზელენსკიმ უკრაინულ ტელეარხ "1+1"-სთან ინტერვიუში. მან ასევე დასძინა, რომ უკრაინა არ ეთანხმება ამერიკული მხარის მიერ შემოთავაზებულ ტერიტორიების გაცვლის ვარიანტს.
ვოლოდიმირ ზელენსკის თქმით, კიევისთვის მნიშვნელოვანია, რომ ნოემბერში დაგეგმილ სამმხრივ მოლაპარაკებებზე მხარეებმა ლიდერების დონეზე ახალი შეხვედრის შესაძლებლობა განიხილონ.
უკრაინის პრეზიდენტმა ასევე ცალკე გააფრთხილა პარტნიორები რუსეთისთვის სანქციების ნაადრევად მოხსნის თაობაზე უკრაინის, აშშ-ისა და რუსეთის ფედერაციის ლიდერების მონაწილეობით სამმხრივი მოლაპარაკებების გამართვამდე.
"სანქციები დაწესდა აგრესიისთვის და არა საუბრის შესაძლებლობისთვის. მე ეს ვუთხარი ამერიკულ დელეგაციას: როდესაც ვსაუბრობთ რუსეთის ლოიალობაზე, არ არის საჭირო მისი ყიდვა ასეთ ფასად. არ მინდა, რომ პუტინთან შეხვედრაზე ინსტრუმენტების გარეშე დავრჩეთ - სანქციების, ფულის ან გაყინული აქტივების გარეშე. რადგან მაშინ მართლაც, როგორც ბატონმა ტრამპმა თქვა, ჩვენს დასტაში არც ისე ბევრი კარტი იქნება", - აღნიშნა ზელენსკიმ.
ნოემბრის მოლაპარაკებებზე, ზელენსკის თქმით, კიევი აპირებს რამდენიმე საკვანძო საკითხის წამოჭრას, მათ შორის ენერგეტიკულ ზავსა და ცეცხლის შეწყვეტას შავ ზღვაში.
წინა დღით უკრაინამ და რუსეთმა გამოთქვეს მზადყოფნა, განაახლონ პირდაპირი მოლაპარაკებები აშშ-ის შუამავლობით. მოსკოვის, ვაშინგტონისა და კიევის დელეგაციების შეხვედრის კონკრეტული თარიღი ჯერჯერობით შეთანხმებული არ არის. რუსეთის პრეზიდენტის თანაშემწემ, იური უშაკოვმა 25 ოქტომბერს განაცხადა, რომ კრემლი შეხვედრის გამართვის შესაძლებლობას 4 ნოემბრის - რუსეთში სახალხო ერთიანობის დღის - შემდეგ განიხილავს.
მანამდე მოსკოვში შეხვედრის შესაძლო ადგილად არაბთა გაერთიანებული საამიროების დედაქალაქს, აბუ-დაბის ასახელებდნენ, ხოლო მისი გამართვის სავარაუდო დროდ - ნოემბრის შუა რიცხვებს. ამის შესახებ რუსულმა მხარემ სტივენ უიტკოფს 21 ოქტომბერს, სანქტ-პეტერბურგში გამართულ შეხვედრაზე აცნობა.
