უკრაინის პრეზიდენტი ვოლოდიმირ ზელენსკი აცხადებს, რომ სამართლიანი მშვიდობის დასამყარებლად უკრაინა არ აღიარებს ოკუპირებულ ტერიტორიებს რუსეთის კუთვნილებად და არ დათანხმდება უკრაინული არმიის შემცირებას.
აღნიშნულის შესახებ ზელენსკიმ ჩერნიგივში განაცხადა, სადაც ის ადგილობრივი ხელისუფლების წარმომადგენლებს შეხვდა.
„ჩვენი პრიორიტეტია ჩვენი ძლიერი არმია. ამიტომ ეს არის წითელი ხაზი – არანაირი არმიის შემცირება. სიმართლე გითხრათ, ჩვენ გავაკეთებთ ყველაფერს, რომ, რაოდენობის თვალსაზრისით, არმია ისეთ მდგომარეობაში დარჩეს, როგორც ახლა არის. დიდი არმია, რომელიც სამჯერ აღემატება ომის დაწყების დროინდელ არმიას. არმია, რომელიც მხოლოდ მოდერნიზაციას შეუძლია. აი, ასეთი ცვლილებები შეიძლება იყოს ომის დასრულების შემდეგ. დაკომპლექტება, გაზრდა და მოდერნიზაცია“, – განაცხადა ზელენსკიმ.
ვოლოდიმირ ზელენსკიმ კიდევ ერთხელ აღნიშნა, რომ უკრაინამ უნდა მიიღოს უსაფრთხოების გარანტიები, რომელიც კონკრეტულად მას სჭირდება. მისივე თქმით, პარტნიორებთან სამომავლო კავშირების საკითხს, როგორიცაა ნატო, უკრაინა დღის წესრიგში შეინარჩუნებს.
„სხვა გეოპოლიტიკური საკითხები – ესაა იმ ტერიტორიების არაღიარება რუსეთის კუთვნილებად, რომელთა ოკუპაციაც რუსეთმა მოახდინა. ეს უკრაინული ტერიტორიებია, ეს ჩვენთვის ერთ-ერთი მთავარი წითელი ხაზია. ნებისმიერ შემთხვევაში, ეს დროებით ოკუპირებული ტერიტორიებია. სამართლიანი მშვიდობა დადგება მაშინ, როდესაც ეს ტერიტორიები დაბრუნდება, მაგრამ თუ შეიძლება, ისე გაკეთდეს, რომ ვიპოვოთ კომპრომისი, ამ ტერიტორიების დაბრუნება მოხდეს დროთა განმავლობაში, დიპლომატიური გზით, ვფიქრობ, შესაძლოა. ეს ეხება ზოგიერთ ტერიტორიას და ეს იქნება ერთადერთი გზა ამის გასაკეთებლად“, – აღნიშნა ზელენსკიმ.
თარგმანი: პირველი არხი
