უნგრეთმა ლგბტ თემის მიმართ სადავო აკრძალვები გააუქმა

ახლა აკრძალვის ქვეშ კვლავ რჩება მხოლოდ ისეთი მასალები, რომლებსაც შეუძლიათ, "სერიოზული ზიანი მიაყენონ" ბავშვების ფიზიკურ, ინტელექტუალურ, ემოციურ ან მორალურ განვითარებას. ეს არის მემარჯვენე-ნაციონალისტი პრემიერ-მინისტრის, ვიქტორ ორბანის მმართველობის პერიოდში ლგბტქ+ თემის წინააღმდეგ მიღებული ზომების პირველი მნიშვნელოვანი გაუქმება უნგრეთში, მისი მემკვიდრის, პეტერ მადიარის თანამდებობაზე დანიშვნის შემდეგ.  

ევროკავშირი მიესალმა ამ გადაწყვეტილებას და მას "ჩვენი საერთო ღირებულებებისადმი ერთგულების მნიშვნელოვანი სიგნალი" უწოდა. ევროკომისარმა თანასწორობის საკითხებში, ჰაჯა ლაჰბიბმა და მომხმარებელთა უფლებების დაცვის კომისარმა, მაიკლ მაკგრატმა ერთობლივ განცხადებაში ხაზი გაუსვეს, რომ "ლგბტქ+ თემის უფლებები ევროკავშირში ფუნდამენტურ უფლებებს წარმოადგენს".  

ვიქტორ ორბანის მმართველობის წლებში უნგრეთის ხელისუფლება ლგბტქ+ წარმომადგენლების უფლებებს ზღუდავდა. 2021 წელს მიღებული კანონი "ბავშვთა დაცვის შესახებ" ითვალისწინებდა, რომ 18 წლამდე ასაკის ბავშვებმა და მოზარდებმა არ უნდა მიიღონ ინფორმაცია ჰომოსექსუალობის ან ტრანსგენდერული ტრანზიციის შესახებ. მას შემდეგ, უნგრეთში ერთსქესიანი ურთიერთობების "დემონსტრირება", მაგალითად, ტელევიზიით, ჯარიმებით ისჯებოდა.  

გარდა ამისა, ორბანის მთავრობა ამ მკაცრ ნორმებს გეი-პრაიდების ასაკრძალად იყენებდა. კრიტიკოსები ამ კანონს ასევე ადანაშაულებენ იმაში, რომ ის ჰომოსექსუალობას ბავშვებზე სექსუალურ ძალადობასთან ათანაბრებდა.  

აპრილში ევროკავშირის სასამართლომ ლუქსემბურგში დაადგინა, რომ ეს კანონი ევროკავშირის კანონმდებლობას ეწინააღმდეგება. 2022 წლის ბოლოდან ევროკავშირმა ამ კანონის გამო, უნგრეთისთვის დაახლოებით ნახევარი მილიარდი ევროს ოდენობის დაფინანსების გამოყოფა გაყინა.  

აპრილში გამართულ საპარლამენტო არჩევნებში პარტია "ტისას" გამარჯვების შემდეგ, ორბანმა, რომელიც უნგრეთს 2010 წლიდან მართავდა, პრემიერის პოსტი დაკარგა. წინასაარჩევნო კამპანიის დროს, მადიარი თავს არიდებდა ლგბტქ უფლებების თემაზე საუბარს, თუმცა მისი გამარჯვების შემდეგ უნგრეთის ლგბტქ თემს საკუთარი უფლებების აღდგენის იმედი გაუჩნდა.