უკრაინულმა ძალებმა რუსეთის ტერიტორიის სიღრმეში მორიგი ოპერაცია განახორციელეს. გავრცელებული ინფორმაციით, იერიში ქალაქ კიროვში მდებარე სტრატეგიულ ობიექტზე — რაკეტების მწარმოებელ საწარმოზე განხორციელდა.
ობიექტი რუსეთის სამხედრო-სამრეწველო კომპლექსის მნიშვნელოვან ნაწილს წარმოადგენს, სადაც საოკუპაციო ძალებისთვის სარაკეტო შეიარაღება მზადდება.
წინასწარი მონაცემებით, სამხედრო ობიექტზე დარტყმა შორსმსროლელი კამიკაძე დრონების მეშვეობით განხორციელდა, რაც რუსული საჰაერო თავდაცვის სისტემებისთვის მოულოდნელი აღმოჩნდა.
ამ ეტაპზე ინფრასტრუქტურაზე მიყენებული ზარალის ზუსტი მასშტაბები და ინფორმაცია შესაძლო მსხვერპლის შესახებ ზუსტდება. რუსეთის ადგილობრივი ხელისუფლება დამატებითი დეტალების გასაჯაროებისგან ჯერჯერობით თავს იკავებს.
კიროვის ოლქი ფრონტის ხაზიდან და უკრაინის საზღვრიდან საკმაოდ დიდი მანძილითაა დაშორებული (დაახლოებით 1,500 კილომეტრამდე). სამხედრო სპეციალისტების შეფასებით, აღნიშნული ოპერაცია კიდევ ერთხელ უსვამს ხაზს უკრაინული ძალების მზარდ შესაძლებლობებს, განახორციელონ ეფექტური წერტილოვანი დარტყმები რუსეთის ღრმა ზურგში.
მსგავსი ოპერაციები უკრაინის იმ სტრატეგიის ნაწილია, რომელიც მიზნად ისახავს მოწინააღმდეგის ლოგისტიკური ჯაჭვის, სტრატეგიული ინფრასტრუქტურისა და იარაღის წარმოების უნარის მაქსიმალურ შეფერხებას.
