გერმანიაში 2026 წლის იანვრიდან აგვისტოს ბოლომდე, სულ მცირე, 12 102-მა ადამიანმა განაცხადა უარი ქვეყნის შეიარაღებულ ძალებში მსახურებაზე. უარის მთქმელთაგან ამ რაოდენობის განცხადება შევიდა ოჯახისა და სამოქალაქო საზოგადოების საქმეთა ფედერალურ უწყებაში (BAFzA), იტყობინება მედიაჯგუფი Funke.
2025 წელს გერმანიის ხელისუფლების მიერ სამხედრო სამსახურზე უარის თქმის შესახებ 3879 განცხადება იქნა მიღებული. ამრიგად, როგორც Funke აღნიშნავს, გერმანიაში უარის მთქმელთა რიცხვი მხოლოდ 2026 წლის რვა თვეში სამჯერ და მეტად აღემატება მთელი გასული წლის მაჩვენებელს.
ამასთანავე, BAFzA-ს წარმომადგენელმა განაცხადა, რომ უარის მთქმელები ხშირად უშვებენ შეცდომებს განცხადებების შევსებისას. მათი შინაარსი "არ შეესაბამება უარის დასაბუთებულად აღიარების მოთხოვნებს", ამიტომ ასეთი განცხადებების "დაბრუნება განხილვის გარეშე გვიწევს", - ციტირებენ მედიასაშუალებები ჩინოვნიკს.
უარის მთქმელთა რაოდენობის მკვეთრი ზრდის მიზეზი გახდა უსაფრთხოების სფეროში არსებული დაძაბული ვითარება და ბუნდესვერში გაწვევის რეფორმის შესახებ კანონი, რომელიც ძალაში 1-ელ იანვარს შევიდა. ის ითვალისწინებს, რომ 2026 წლიდან 18 წლის ახალგაზრდებმა უნდა შეავსონ კითხვარი, რომელშიც ისინი პასუხობენ კითხვას შეიარაღებულ ძალებში გაწევრიანების მზადყოფნის შესახებ. ახალგაზრდებს უფლება აქვთ, წინასწარ განაცხადონ უარი.
სავალდებულო სამსახური, რომელიც 2011 წელს შეჩერდა, შესაძლოა, კვლავ ნაწილობრივ იქნეს შემოღებული ბუნდესტაგის გადაწყვეტილებით. ე.წ. "საჭიროების მიხედვით სამხედრო ვალდებულების" ამოქმედება იგეგმება იმ შემთხვევაში, თუ ვერ მოხერხდება მოხალისეთა საჭირო რაოდენობის მიღწევა - გერმანიის თავდაცვის სამინისტროს გეგმების მიხედვით კი, 2035 წლისთვის ბუნდესვერში ერთდროულად 260 000-მდე ადამიანმა უნდა იმსახუროს.
ბოლო წლებში ბუნდესვერმა გააფართოვა ახალი რეკრუტების ძიების არეალი, მათ შორის, საკუთარი სტენდის ორგანიზებით Gamescom-ზე - ვიდეოთამაშების ერთ-ერთ უდიდეს მსოფლიო გამოფენაზე, რომელიც კელნში იმართება. ამავდროულად, გერმანელი მოსწავლეები აკრიტიკებენ "საჭიროების მიხედვით სამხედრო ვალდებულების" შესაძლო დაბრუნების იდეას - სექტემბერში ამასთან დაკავშირებით ქვეყნის რიგ ქალაქებში მასშტაბური საპროტესტო აქციები გაიმართა.
