თეთრ სახლში გამართული ბრიფინგის დროს თეთრი სახლის პრესმდივანმა კეროლაინ ლევიტმა ფრანგ ევროპარლამენტარ რაფაელ გლუკსმანს დაბალი დონის ფრანგი პოლიტიკოსი უწოდა.
გუშინ, 16 მარტს, მოძრაობა Place Publique-ის ყრილობაზე, მოძრაობის ერთ-ერთმა დამფუძნებელმა და თანათავმჯდომარემ, რაფაელ გლუკსმანმა, შეერთებულ შტატებს ფრანგებისთვის თავისუფლების ქანდაკების დაბრუნებისკენ მოუწოდა.
„ჩვენ ვეტყვით ამერიკელებს, რომლებმაც აირჩიეს ტირანების მხარე, ამერიკელებს, რომლებმაც გაათავისუფლეს მკვლევრები თავისუფალი აზროვნების გამო: დაგვიბრუნეთ თავისუფლების ქანდაკება!
ჩვენ ის თქვენ გაჩუქეთ, თუმცა, როგორც ჩანს, თქვენ გძულთ იგი. ასე რომ, აქ, სახლში უფრო კარგად იგრძნობს თავს“, - თქვა გლუკსმანმა Place Publique-ის ყრილობაზე სიტყვით გამოსვლისას.
დღეს, თეთრ სახლში გამართული ბრიფინგის დროს, თეთრის სახლის პრესმდივანს, კეროლაინ ლევიტს, ჟურნალისტმა შეახსენა, რომ ევროპარლამენტის წევრმა საფრანგეთიდან თავისუფლების ქანდაკების უკან დაბრუნება მოითხოვა
.ევროპარლამენტის წევრი საფრანგეთიდან აცხადებს, რომ „აშშ აღარ განასახიერებს თავისუფლების ქანდაკების ღირებულებებს, მათ სურთ ქანდაკების დაბრუნება. აქედან გამომდინარე, პრეზიდენტი ტრამპი აპირებს თავისუფლების ქანდაკების უკან დაბრუნებას? - იკითხა ჟურნალისტმა.
რა თქმა უნდა არა და კარგი იქნება „ამ უსახელო, დაბალი დონის ფრანგ პოლიტიკოსს“ შევახსენოთ, რომ ამერიკის შეერთებული შტატების დამსახურებაა, ფრანგები ახლა გერმანულად რომ არ ლაპარაკობენ. ისინი ჩვენი დიადი ქვეყნის ძალიან მადლიერები უნდა იყვნენ, მიუგო კეროლაინ ლევიტმა.
შეგახსენებთ, რომ რაფაელ გლუკსმანი 2009-2012 წლებში პრეზიდენტ მიხეილ სააკაშვილის მრჩეველი იყო. ამავე წლებში იგი ქორწინებაში იმყოფებოდა შინაგან საქმეთა მინისტრის პირველ მოადგილესთან, ეკატერინე ზღულაძესთან.
