სერბეთის პრეზიდენტმა ალექსანდრ ვუჩიჩმა ერისადმი მიმართვაში გამოაცხადა, რომ გადადგა თანამდებობიდან, რათა მონაწილეობა მიიღოს ქვეყნის ვადამდელ საპარლამენტო არჩევნებში და იბრძოლოს პრემიერ-მინისტრის პოსტისთვის.
ვუჩიჩი სერბეთის პრეზიდენტი 2017 წლის 31 მაისს გახდა, ხოლო ხელახლა 2022 წლის აპრილში აირჩიეს. მისი საპრეზიდენტო უფლებამოსილების მეორე ვადა 2027 წლის შუა რიცხვებში იწურებოდა. სერბეთის კონსტიტუციის თანახმად, ერთსა და იმავე პირს არ შეუძლია სახელმწიფოს მეთაურის პოსტის დაკავება ორ ვადაზე მეტხანს. საკუთარი გადადგომა ვუჩიჩმა ჯერ კიდევ 2025 წლის აგვისტოში დააანონსა, თუმცა მაშინ მას გადადგომის გადაწყვეტილება პრემიერობისთვის ბრძოლის გეგმებთან არ დაუკავშირებია.
სექტემბრის დასაწყისში ვუჩიჩმა გამოაცხადა სახალხო სკუპშტინის (ერთპალატიანი პარლამენტის) დაშლისა და 25 ოქტომბერს ვადამდელი არჩევნების დანიშვნის შესახებ. მაშინ მმართველი "სერბული პროგრესული პარტიის" (SNS) მთავარმა კომიტეტმა დაადასტურა, რომ სიის "გაერთიანებული სერბეთი" ლიდერი ვუჩიჩი იქნება. ის ასევე გახდება პრემიერ-მინისტრობის კანდიდატი გამარჯვების შემთხვევაში.
სერბეთის პრეზიდენტის მოვალეობის შემსრულებელი სახალხო სკუპშტინის თავმჯდომარე ანა ბრნაბიჩი გახდება.
