საბერძნეთის ქალაქ პატრის გარეუბანში ხიდის ერთ-ერთი სექციის ჩამონგრევას მსხვერპლი მოჰყვა
სულ მცირე ორი ადამიანი დაიღუპა და რვა დაშავდა საბერძნეთში, ქალაქ პატრის გარეუბანში ხიდის ერთ-ერთი სექციის ჩამონგრევის შედეგად. ბერძნული პრესის ვარაუდით, ნანგრევების ქვეშ შესაძლოა იყვნენ ხიდს მიმდებარე ბოშათა დასახლების ის მცხოვრებლები, რომლებიც მცხუნვარე მზეს გაერიდნენ და თავი ჩრდილქვეშ შეაფარეს.
ხიდის ჩამონგრევის ზუსტი მიზეზი უცნობია, თუმცა ცნობილია, რომ ხიდს სტრუქტურული მთლიანობის მხრივ პრობლემები ჰქონდა და მასზე სარემონტო სამუშაოები 2021 წლიდან მიმდინარეობდა. ძლიერი კოროზიის გამო რემონტი არა ერთბაშად მთელ ხიდზე, არამედ ხიდის ცალკეულ მონაკვეთებზე, მონაცვლეობით ტარდებოდა. ამ დროისთვის რემონტზე 6,5 მილიონ ევროზე მეტია დახარჯული.
