აშშ-ის ვიცე-პრეზიდენტმა ჯეი დი ვენსმა 2028 წლის საპრეზიდენტო არჩევნებისთვის საკუთარი პოლიტიკური პლატფორმის ფორმირება დაიწყო, — იტყობინება Reuters, სექტემბერში რესპუბლიკური პარტიის ყრილობის შემდეგ მისი ნახევარ ათეულზე მეტი გამოსვლის ანალიზის საფუძველზე.
როგორც Reuters აღნიშნავს, საჯარო ღონისძიებების დროს ის ცდილობს, ნაკლებად დააკავშიროს საკუთარი თავი პრეზიდენტ დონალდ ტრამპთან და ყურადღებას უთმობს იმ საკითხებს, რომლებიც მისი გარემოცვის აზრით, ამომრჩევლებში მოთხოვნადია.
თავის გამოსვლებში ვენსი აქცენტს აკეთებს ეკონომიკურ ნაციონალიზმზე, საზოგადოებრივი უსაფრთხოების უზრუნველყოფასა და საგარეო პოლიტიკის მიმართ უფრო თავშეკავებულ მიდგომაზე. მისი გუნდის წარმომადგენელთა შეფასებით, სწორედ ამ მიმართულებებს შეუძლია ამომრჩეველთა მხარდაჭერის მოპოვება. ამასთან, ვიცე-პრეზიდენტი პრაქტიკულად არ ეხება მოქმედი სახელმწიფოს მეთაურის ინიციატივებს.
მანამდე ვენსი საჯაროდ გამოვიდა ირანთან ომის წინააღმდეგ და მას შუალედურ არჩევნებში რესპუბლიკური პარტიის წარუმატებლობის ერთ-ერთი მთავარი ფაქტორი უწოდა. გარდა ამისა, მან მოუწოდა პარტიის ხელმძღვანელობას, მეტი ყურადღება დაუთმოს ცხოვრების ხარჯების ზრდას და გადახედოს ისრაელთან ურთიერთობისადმი მიდგომას.
რესპუბლიკური პარტიის ხელმძღვანელობაში ვენსს უკვე განიხილავენ 2028 წელს პრეზიდენტობის კანდიდატად წარდგენის ერთ-ერთ მთავარ შესაძლო პრეტენდენტად. თუმცა, თავად პოლიტიკოსს საპრეზიდენტო რბოლაში მონაწილეობის განზრახვის შესახებ ჯერ არ განუცხადებია.
ანალიტიკოსების აზრით, ვენსის წინაშე რთული ამოცანა დგას: მან უნდა შეინარჩუნოს ტრამპის მხარდამჭერთა კეთილგანწყობა შიდაპარტიული შერჩევის დროს, და ამავე დროს, მოახდინოს მოქმედი პრეზიდენტის პოლიტიკური მემკვიდრეობისგან დისტანცირება საყოველთაო ეროვნული კენჭისყრის წინ.
პრეზიდენტის ადმინისტრაციაში მიიჩნევენ, რომ ვიცე-პრეზიდენტის დამოუკიდებელი რიტორიკა არ ნიშნავს მასსა და ტრამპს შორის კონფლიქტის წარმოშობას. წყაროები თეთრ სახლში ამას ხსნიან ვენსის სურვილით, გამოკვეთოს ის თემები, რომლებიც მომავალში პარტიის შიგნით განხილვის საგანი შეიძლება გახდეს.
თავად ტრამპმა მანამდე მედიის წარმომადგენლებს განუცხადა, რომ თავისი მოადგილის პოზიციას მშვიდად ეკიდება.
