რუსეთის პრეზიდენტმა ვლადიმირ პუტინმა აშშ-ის ლიდერთან, დონალდ ტრამპთან სატელეფონო საუბრისას განაცხადა, რომ მოსკოვს ევროპის მიმართ რაიმე აგრესიული ან მტრული გეგმები არ გააჩნია.
როგორც კრემლში გამართული საუბრის შემდეგ განმარტეს, ლიდერებმა ერთსაათიანი კონფიდენციალური სატელეფონო ზარის დროს უკრაინაში მიმდინარე კონფლიქტის დარეგულირების გზები და ამერიკელი სპეციალური წარმომადგენლების ბოლოდროინდელი ვიზიტები განიხილეს.
რუსული მხარის ცნობით, პუტინმა ხაზგასმით აღნიშნა, რომ საუბრები რუსულ საფრთხესა და ევროპაზე შესაძლო თავდასხმაზე მხოლოდ სპეკულაციაა. მისი თქმით, ევროპული ქვეყნები ამ მითებს იყენებენ იმისათვის, რომ გაამართლონ უკრაინისთვის გაწეული მხარდაჭერა და საკუთარი სამხედრო ხარჯების ზრდა.
დონალდ ტრამპმა კიდევ ერთხელ გაუსვა ხაზი უკრაინაში კონფლიქტის სწრაფად დასრულების აუცილებლობას. თავის მხრივ, პუტინმა ამერიკელ კოლეგას ფრონტზე არსებული ვითარების "რეალისტური შეფასება" გაუზიარა.
მხარეები შეთანხმდნენ, რომ კონტაქტს შეინარჩუნებენ და ჰუმანიტარულ საკითხებზე, მათ შორის ტყვეთა გაცვლაზე მუშაობას გააგრძელებენ. ტრამპის პოზიციით, ომის დასრულებამ შესაძლოა, გახსნას გზა ვაშინგტონსა და მოსკოვს შორის სავაჭრო-ეკონომიკური ურთიერთობების აღსადგენად.
