ახალი კანონი, რომელიც საფრანგეთის სენატმა მიიღო, ითვალისწინებს სასჯელის გამკაცრებას არალეგალური კონცერტების წინააღმდეგ.
საფრანგეთის სენატმა არალეგალური მუსიკის ფესტივალების, ე.წ „რეივების“ წინააღმდეგ ზომები გაამკაცრა. ორგანიზატორებს პატიმრობა და დიდი ოდენობის ჯარიმა ემუქრებათ
საფრანგეთის სენატმა ორშაბათს, გვიან ღამით, რამდენიმე ღონისძიება გაამკაცრა, რომლებიც მიზნად ისახავს არალეგალური ელექტრონული მუსიკის ფესტივალების აღკვეთას.
მთავრობის ახალი კანონპროექტის, „Ripost“-ის ფარგლებში, გადაწყდა ასეთი ღონისძიებების მონაწილეთა დასჯა, როგორც ჯარიმით, ასევე საპატიმრო ღონისძიებით.
კანონპროექტის განხილვას წინ უსწრებდა რამდენიმე დღის წინ ბურჟის სიახლოვეს (შერის დეპარტამენტი), სამხედრო პოლიგონზე გამართული მასშტაბური და უნებართვო კონცერტი. არალეგალური მუსიკალური შეკრებების წინააღმდეგ მიმართული ეს ზომები პარლამენტში საკმაოდ მწვავე დებატებს პროგნოზირებდა — მსგავსად იმ ინიციატივისა, რომელიც ეროვნულმა ასამბლეამ აპრილის დასაწყისში მიიღო.
საბოლოოდ, სენატში, თითქმის ცარიელ დარბაზში შუაღამის შემდეგ გამართული განხილვა საკმაოდ სწრაფად დასრულდა. მიუხედავად ამისა, მემარცხენე ფრთის წარმომადგენელთა ნაწილი აღშფოთდა ასეთი მკაცრი ზომების გამო და აღნიშნა, რომ ეს არის „სოფლად მცხოვრები ახალგაზრდობის წინააღმდეგ გალაშქრება“.
ექვსი თვიდან ორ წლამდე პატიმრობა
სენატმა მხარი დაუჭირა ცვლილებას, რომლის მიხედვითაც, მონაწილეთა რაოდენობის ზღვარი, რომლის ზემოთაც პრეფექტურაში წინასწარი დეკლარაციის წარდგენაა სავალდებულო, ამჟამინდელი 500-დან 250 ადამიანამდე შემცირდება. გარდა ამისა, წესდება ახალი სასჯელი არალეგალური კონცერტის ორგანიზებისთვის, რომელიც ორ წლამდე პატიმრობასა და 30 000 ევროს ოდენობის ჯარიმას ითვალისწინებს.
