PURL (Prioritised Ukraine Requirements List, "უკრაინისთვის პრიორიტეტული მოთხოვნების სია") პროგრამის ფარგლებში უკრაინისთვის ამერიკული შეიარაღების მიწოდება გრაფიკის მიხედვით მიმდინარეობს, - განაცხადა NATO-ს გენერალური მდივნის მოადგილემ, რადმილა შეკერინსკამ ბრიუსელში კიევის უსაფრთხოების ფორუმის ღონისძიებაზე. მისი თქმით, ალიანსმა იმაზე მეტი შეიარაღებაც კი მიაწოდა, ვიდრე დაფინანსებული იყო.
"ნება მიბოძეთ, სრულიად მკაფიოდ განვაცხადო: PURL-ის პაკეტების მიწოდება გრაფიკის შესაბამისად მიმდინარეობს. ჩვენ იმაზე მეტიც კი მივაწოდეთ, ვიდრე დაფინანსება შევძელით, რადგან გვესმის, რომ საგანგებო ვითარებაა", - აღნიშნა შეკერინსკამ.
PURL-ის პროგრამის ფარგლებში NATO-ს მოკავშირეები და ალიანსის პარტნიორები უკრაინისთვის ამერიკული შეიარაღების შესყიდვას აფინანსებენ, ალიანსი კი მიწოდების კოორდინაციას ახდენს. NATO-ში უკრაინის მისიის ხელმძღვანელმა ალიონა გეტმანჩუკმა, რომელიც ფორუმის მომდევნო დისკუსიაში მონაწილეობდა, ასევე დაადასტურა, რომ პროგრამა მუშაობას განაგრძობს, აშშ კი შეიარაღების ახალ პაკეტებს აყალიბებს. მისი თქმით, სწორედ PURL-ის მეშვეობით იღებს უკრაინა Patriot-ის კომპლექსებისთვის გამიზნული გადამჭრელი რაკეტების აბსოლუტურ უმრავლესობას.
შეკერინსკამ გადამჭრელი რაკეტების მსოფლიო მარაგების სიმცირესა და არასაკმარის საწარმოო სიმძლავრეებზე გაამახვილა ყურადღება. მისი თქმით, თავდაცვის მრეწველობამ ჯერ კიდევ ვერ შეძლო წარმოების იმ დონეზე გაზრდა, რომ სრულად დააკმაყოფილოს მოთხოვნა. დეფიციტს ამწვავებს უკრაინაში მიმდინარე ხანგრძლივი ომი და სხვა კონფლიქტები.
NATO მოუწოდებს მოკავშირეებს, გამოყონ რაკეტები არსებული არსენალებიდან, ასევე უკრაინისკენ გადაამისამართონ ის მიწოდებები, რომლებსაც თავად ქვეყნები უახლოეს კვირებში ან თვეებში ელიან. მათი მარაგების შევსება მოგვიანებით, შემდგომი მიწოდებების ხარჯზე იგეგმება, - განმარტა გენერალური მდივნის მოადგილემ.
