ამის შესახებ თბილისში ვიზიტით მყოფმა გერმანიის ბუნდესტაგის საგარეო საქმეთა კომიტეტის თავმჯდომარე მიხაელ როთმა, ოპოზიციასთან შეხვედრის შემდეგ განაცხადა.
შეკითხვაზე, „ამ კანონის დამტკიცების შემთხვევაში, გაიხსნება თუ არა წლის ბოლოს ევროკავშირის წევრობაზე მოლაპარაკებები?“, – მიხაელ როთმა აღნიშნა: „არა, ნამდვილად არა. ამ კანონით მე ვერ ვხედავ წევრობის შესახებ მოლაპარაკებების გახსნის ვერანაირ შანსს. ევროკავშირის გზავნილი ძალიან მკაფიოა“.
მისივე თქმით, თხოვნით მიმართავს საქართველოს მთავრობას, უკან გაიწვიოს პარლამენტში წარდგენილი კანონპროექტი. მიხაელ როთი ამბობს, რომ ვერ ხედავს საქართველოსთვის ნათელი მომავლის შანსს, თუ მთავრობა არ გაიწვევს ამ კანონს.
„ჩემთვის დიდი პატივია, ვიყო ევროპული დელეგაციის ნაწილი, ევროპარლამენტიდან ჩემი კოლეგების შემადგენლობით, რათა გავაგზავნოთ მკაფიო გზავნილი. ჩვენ ვართ საქართველოს მეგობრები, ჩვენ ვართ ქართველი ხალხის მეგობრები. უკიდურესად მოწოდებული ვართ, რომ საქართველოს ადგილი არის ევროპის გულში და ეს ნიშნავს, რომ ჩვენ ვმუშაობთ ბევრს ევროკავშირისკენ საქართველოს გზაზე. თუმცა, გთხოვთ, ძვირფასო მთავრობავ და ძვირფასო მმართველო პარტიავ, შეაჩერეთ „უცხოური აგენტების“ კანონი. მე ვერ ვხედავ საქართველოსთვის ნათელი მომავლის რამე შანსს, თუ მთავრობა არ გაიწვევს ამ კანონს. ჩემი მადლიერება მიმართულია იმ ხალხისადმი, რომელიც ქუჩაში მშვიდობიან დემონსტრაციას მართავს. თბილისი არის ევროპის ნამდვილი დედაქალაქი ამ გამოწვევებით სავსე პერიოდში. მაქვს დიდი იმედი, რომ ჩვენ გვექნება მთავრობის, პარლამენტის, ოპოზიციისა და სამოქალაქო საზოგადოების წარმომადგენლებთან საუბრის შანსი“, – განაცხადა მიხაელ როთმა.
