ცენტრალურ რომში შუა საუკუნეების დროინდელი კოშკის ნაწილობრივ ჩამონგრევის შემდეგ რუსეთის საგარეო საქმეთა სამინისტროს სპიკერმა, მარია ზახაროვამ განაცხადა, რომ იტალიაში "ეკონომიკიდან დაწყებული კოშკებით დამთავრებული" ყველაფერი ჩამოიშლება, თუ ქვეყნის მთავრობა, უკრაინისთვის დახმარების გაწევით, გადასახადების გადამხდელთა ფულის "უაზროდ ხარჯვას" გააგრძელებს.
"ნება მომეცით, შეგახსენოთ, რომ მიმდინარე წლის მაისში იტალიის საგარეო საქმეთა სამინისტრომ განაცხადა, რომ "უკრაინისადმი იტალიის მხარდაჭერა, მათ შორის სამხედრო დახმარება და EU-ს მექანიზმების მეშვეობით გადახდილი კონტრიბუციები, დაახლოებით €2.5 მილიარდს აღწევს, საიდანაც დაახლოებით €1 მილიარდი ლტოლვილებისთვისაა, €310 მილიონი სახელმწიფო ბიუჯეტის მხარდასაჭერად და €93 მილიონი ჰუმანიტარული აქტივობებისთვის." მანამ, სანამ იტალიის მთავრობა გადასახადების გადამხდელთა ფულს უაზროდ ხარჯავს, იტალია ყველაფერს ჩამოშლის: ეკონომიკიდან დაწყებული კოშკებით დამთავრებული." - თქვა ზახაროვამ.
ცნობისთვის, რომში მე-13 საუკუნის კონტის კოშკი (Torre dei Conti) რემონტს გადიოდა, როდესაც ნაწილობრივ ჩამოიშალა. შედეგად, ერთი მუშა ნანგრევებში მოჰყვა, დანარჩენი სამი კი საავადმყოფოში გადაიყვანეს. AFP-ს სახანძრო სამსახურის სპიკერმა განუცხადა, რომ მათგან ერთ-ერთის ჯანმრთელობის მდგომარეობა კრიტიკული იყო.
