გერმანიის საგარეო საქმეთა მინისტრს, იოჰან ვადეფულს მიაჩნია, რომ სწორედ რუსეთმა უნდა გადადგას პირველი ნაბიჯი ნაწილობრივი ზავისკენ, რომელზედაც აშშ-ის პრეზიდენტმა, დონალდ ტრამპმა ისაუბრა. გერმანელმა პოლიტიკოსმა სამშაბათს, 13 ოქტომბერს, ვარშავის უსაფრთხოების ფორუმის მიმდინარეობისას შექმნილ ვითარებაზე კომენტარი გააკეთა.
როგორც კი რუსეთი მზად იქნება ენერგეტიკული ზავი დაიცვას, უკრაინაც დაიცავს მას, აღნიშნა ვადეფულმა.
"ამ სიტუაციაში მკაფიოდ უნდა ითქვას: პირველი ნაბიჯები უკრაინამ კი არ უნდა გადადგას. უკრაინას ეს ომი არ დაუწყია. სინამდვილეში, პირველი ნაბიჯები რუსეთმა უნდა გადადგას", — ციტირებს მის სიტყვებს სააგენტო dpa.
კიევმა უკვე განმარტა, რომ მზადაა შეუერთდეს, თუ ორმხრივი შეთანხმება მიიღწევა, დასძინა ვადეფულმა. გერმანიის მთავრობა სრულად უჭერს მხარს უკრაინის ხელისუფლებას ამ პოზიციაში.
გერმანიის საგარეო უწყების ხელმძღვანელს ასევე მიაჩნია, რომ დადგა მომენტი, როდესაც აუცილებელია "ჩამოყალიბდეს დამოუკიდებელი ევროპული პოზიცია" უკრაინაში რუსეთის ომის შეწყვეტასთან დაკავშირებით.
ამასთან, ვადეფულმა და დიდი ბრიტანეთის საგარეო საქმეთა მინისტრმა, ედ მილიბენდმა რუსეთის წინააღმდეგ სანქციების გამკაცრებისკენ მოუწოდეს იმ განცხადებების ფონზე, რომლებიც ტრამპის მხრიდან რუსულ დიზელის საწვავზე შეზღუდვების შემსუბუქებას ეხებოდა, იტყობინება სააგენტო AFP. "ახლა სანქციების რეჟიმის შემსუბუქების კი არა, მისი გამკაცრების დროა", — განაცხადა გერმანელმა მინისტრმა. "ჩვენ ჩვენს კურსს ვიცავთ", — დასძინა იოჰან ვადეფულმა.
ევროკავშირის სასანქციო სიებში ფიზიკური და იურიდიული პირების რეკორდული რაოდენობაა შეყვანილი: 1600-ზე მეტი ფიგურანტი. მანამდე ვადეფული აცხადებდა, რომ რუსეთზე ზეწოლა მანამ უნდა გაძლიერდეს, სანამ პუტინი სერიოზული სამშვიდობო მოლაპარაკებებისთვის მზად არ იქნება.
