ევროკავშირის საბჭომ გააფართოვა რუსეთის ფედერაციის წინააღმდეგ დაწესებული სანქციები და სიაში შეიყვანა 30 პირი და ორი ორგანიზაცია, რომლებსაც ბრიუსელში პასუხისმგებლად მიიჩნევენ რუსულ დეზინფორმაციულ კამპანიებზე, უცხო სახელმწიფოთა საინფორმაციო სივრცეში ჩარევასა და მავნებლურ კიბერაქტივობაზე.
ერთ-ერთი ორგანიზაცია, რომელიც შეზღუდვების ქვეშ მოექცა, არის მოსკოვური "სოციალური პროექტირების სააგენტო" (АСП), რომელიც პოლიტიკური კონსალტინგისა და საზოგადოებასთან ურთიერთობის სფეროში მუშაობს. როგორც დოკუმენტიდან ირკვევა, კომპანია მონაწილეობდა ევროკავშირის ქვეყნების წინააღმდეგ მიმართულ საინფორმაციო ზემოქმედების მასშტაბურ ოპერაციებში, რომლებსაც რუსეთის ხელისუფლება უწევდა კოორდინაციას. კერძოდ, საუბარია 2024 წელს ევროპარლამენტის არჩევნების წინ საზოგადოებრივ აზრზე ზემოქმედების მცდელობებზე, ასევე გერმანიისა და საფრანგეთის წინააღმდეგ მიმართულ საქმიანობაზე.
სასანქციო სიაში შეყვანილია АСП-ის 24 თანამშრომელიც, რომლებსაც ევროკავშირი შესაბამისი საინფორმაციო კამპანიების შემუშავებასა და განხორციელებაში მონაწილეებად მიიჩნევს.
გარდა ამისა, ევროკავშირის საბჭომ განახლებულ სიაში შეიყვანა რიგი რუსი პროპაგანდისტები: ტელეწამყვანები ვიტალი ელისეევი და პეტრე მარჩენკო, უკრაინული წარმოშობის სამხედრო ბლოგერი იური პოდოლიაკა, ასევე ტელეარხ RT International-ის ჟურნალისტი ჩეი ბოუზი ინფორმაციით მანიპულირებისა და ისეთი ნარატივების გავრცელებისთვის, რომლებიც ლეგიტიმაციას უკეთებენ და მხარს უჭერენ უკრაინის წინააღმდეგ რუსეთის მიმდინარე აგრესიულ ომს.
ცალკე შეზღუდვები დაუწესდა პრორუსულ ჰაკერულ დაჯგუფება NoName057(16)-ს, რომელიც ომის დაწყების შემდეგ შეიქმნა. ბრიუსელში მიიჩნევენ, რომ ეს ჯგუფი დგას ევროკავშირის ქვეყნების, უკრაინისა და აშშ-ის სახელმწიფო დაწესებულებებზე, კრიტიკული ინფრასტრუქტურის ობიექტებსა და კერძო კომპანიებზე განხორციელებული მრავალრიცხოვანი DDoS-შეტევების უკან. ასეთი შეტევების სამიზნეებს შორის სახელდება ენერგეტიკული, საფინანსო და სატრანსპორტო სფეროები, წყალმომარაგების ობიექტები, ასევე საარჩევნო კამპანიების მონაწილეები.




