ესპანეთის პრემიერ-მინისტრმა პედრო სანჩესმა 24 აპრილს გამოაცხადა საჯარო ღონისძიებებში მონაწილეობის შეჩერება მომდევნო რამდენიმე დღის განმავლობაში და არ გამორიცხა გადადგომაც.
ესპანეთის პრემიერ-მინისტრმა თქვა, რომ ის განიხილავს შესაძლო გადადგომას „დევნისა და განადგურების“ კამპანიის ფონზე, რომელსაც მისი ოჯახი განიცდის მისი მეუღლის ბეგონია გომესთან დაკავშირებული ინფორმაციის შედეგად.
ოთხშაბათს El Confidencial-მა გაავრცელა ინფორმაცია, რომ მადრიდის სასამართლომ გადაწყვიტა, გაეხსნა ფარული გამოძიება გომესთან და მის პროფესიულ საქმიანობასთან დაკავშირებით "მანოს ლიმპიასის" ჯგუფის საჩივრის შემდეგ, რომელიც ცნობილია მთავრობისადმი საჩივრებით.
სარჩელი გომესს, სანჩესის მეუღლეს ბრალს სდებს საგანმანათლებლო ცენტრ IE Africa Center-ში მუშაობის დროს გავლენით ვაჭრობასა და კორუფციაში. ამტკიცებენ, რომ იგი დაეხმარა სახელმწიფო სუბსიდიების მოპოვებაში რამდენიმე კომპანიას, რომლებთანაც მუშაობდა.
წერილში ესპანეთის მთავრობის მეთაური აცხადებს, რომ მის წინააღმდეგ ბრალდებებს ბოლო თვეებში მიზანმიმართულად და კოორდინირებულად ავრცელებენ ულტრამემარჯვენე ოპონენტები, კერძოდ, სახალხო პარტიის ლიდერი ალბერტო ნუნეს ფეიიო და Vox-ის ხელმძღვანელი სანტიაგო აბასკალი.
სანჩესმა დაარწმუნა, რომ მისი მეუღლე სასამართლოსთან ითანამშრომლებს, მაგრამ იმავდროულად, მას სურს, "შეჩერდეს და დაფიქრდეს".
„სასწრაფოდ უნდა ვუპასუხო კითხვას, მიღირს თუ არა ამის გაკეთება, მიუხედავად ჭაობისა, რომელშიც მემარჯვენეები და ულტრამემარჯვენეები ცდილობენ პოლიტიკის ჩათრევას. უნდა გავაგრძელო მთავრობის ხელმძღვანელობა თუ უარი ვთქვა ამ დიდ პატივზე“, - წერს სანჩესი.
