აშშ-ის პრეზიდენტმა დონალდ ტრამპმა ოფიციალურად დაადასტურა გავრცელებული ცნობები იმის შესახებ, რომ მან საჰაერო მგზავრობის დროს, თურქეთში ყოფნისას, უსაფრთხოების მიზნით, საპრეზიდენტო თვითმფრინავი სასწრაფოდ შეცვალა. აღნიშნული გადაწყვეტილება კონკრეტული საფრთხის შესახებ მიღებული ოპერატიული ინფორმაციის საფუძველზე მიიღეს.
"დიახ, ჩვენ დაგვჭირდა ბორტის შეცვლა თურქეთში, რადგან მივიღეთ ძალიან მკაფიო და სერიოზული გაფრთხილება შესაძლო საფრთხის შესახებ. ჩვენი უსაფრთხოების სამსახურებმა იმოქმედეს სწრაფად და პროფესიონალურად. ვითარება სრულ კონტროლს ექვემდებარებოდა და მგზავრობა უსაფრთხო გარემოში გავაგრძელეთ," — განაცხადა დონალდ ტრამპმა მედიასთან საუბრისას.
ამერიკული მხარის განმარტებით, გადაწყვეტილება პრევენციული ხასიათის იყო. სპეციალური სამსახურისა და ადგილობრივი ძალოვანი სტრუქტურების კოორდინირებული მუშაობით, სარეზერვო ბორტზე გადასვლა უმოკლეს დროში და ყოველგვარი ინციდენტის გარეშე განხორციელდა.
"უსაფრთხოება არის ჩვენი მთავარი პრიორიტეტი. ყველა აუცილებელი პროცედურა შესრულდა და მგზავრობა გეგმის მიხედვით გაგრძელდა," — აღნიშნეს აშშ-ის საპრეზიდენტო ადმინისტრაციის პრესსამსახურში.
