Bloomberg-ის ინფორმაციით, შავ ზღვაში, რუსეთის ქალაქ ნოვოროსიისკთან ახლოს, ბერძნული კომპანიის მართვაში არსებულ ნავთობტანკერს Skiros თავს დაესხნენ. ინციდენტი მას შემდეგ მოხდა, რაც გემმა კასპიის მილსადენ კონსორციუმის (CPC) ტერმინალზე რუსული წარმოშობის ნავთობი დატვირთა.
როგორც სააგენტო ინფორმირებულ წყაროებზე დაყრდნობით იტყობინება, Suezmax-ის კლასის ტანკერს, რომელსაც დაახლოებით 1 მილიონი ბარელი ნავთობის გადაზიდვა შეუძლია, თავს უშუალოდ ტერმინალის სიახლოვეს დაესხნენ.
ათენში მდებარე კომპანიამ, რომელიც გემს მართავს, განაცხადა, რომ ინციდენტის შედეგად არავინ დაშავებულა და გარემოს დაბინძურება (ნავთობის დაღვრა) არ დაფიქსირებულა.
ეს არის პირველი შემთხვევა თითქმის სამი კვირის განმავლობაში, როდესაც კასპიის მილსადენის კონსორციუმის (CPC) ტერმინალთან დაკავშირებულ გემზე თავდასხმა განხორციელდა. აღნიშნული ტერმინალი ყაზახური ნავთობის ექსპორტის მთავარი არტერიაა, თუმცა კონკრეტულ შემთხვევაში გემმა რუსული წარმოშობის ტვირთი წამოიღო.
ექსპერტების შეფასებით, მიმდინარე ინციდენტი კიდევ ერთხელ უსვამს ხაზს იმ რისკებს, რასაც შავ ზღვაში კომერციული გადაზიდვები და რუსული ენერგორესურსების ტრანსპორტირება აწყდება.
