რუსეთი უკრაინის წინააღმდეგ საომარი მოქმედებების ახალ, უფრო მასშტაბურ ეტაპზე გადასასვლელად ემზადება. როგორც Bloomberg კრემლთან დაახლოებულ წყაროებზე დაყრდნობით წერს, სამხედრო დაძაბულობის ზრდა მას შემდეგ იგეგმება, რაც მხარეებმა დაასკვნეს, რომ სამშვიდობო მოლაპარაკებები ჩიხში შევიდა და ყველა არსებული დიპლომატიური მექანიზმი, ფაქტობრივად, ამოიწურა.
არსებული ცნობებით, მოსკოვი განიხილავს უკრაინაზე, მათ შორის, კიევის ცენტრსა და სხვა მსხვილ ქალაქებზე, ძლიერი, ბალისტიკური რაკეტებით დარტყმების ინტენსივობის გაზრდას. კრემლში მიაჩნიათ, რომ დასავლეთის სანქციები და უკრაინული მხარის მიერ რუსულ ნავთობგადასამუშავებელ ქარხნებსა და ლოგისტიკურ ქსელებზე მიტანილი იერიშები მიზანს ვერ აღწევს და საომარი მოქმედებების შეწყვეტას ვერ გამოიწვევს.
გამოცემის ინფორმაციით, მოსკოვში უკრაინულ თავდასხმებს NATO-ს წევრი სახელმწიფოების პირდაპირ აქტივობად სულ უფრო მეტად აღიქვამენ, რადგან ალიანსის წევრები კიევს შეიარაღებითა და სადაზვერვო მონაცემებით ამარაგებენ. იმ პირობებში, როდესაც დიპლომატიური გზები შეზღუდულია, კრემლი სამხედრო მიზნების მისაღწევად ძალების შემდგომ მობილიზაციასა და ესკალაციას ალტერნატივას არ უტოვებს.
პარალელურად, ინტენსიური დარტყმებისა და ფრონტზე არსებული დაძაბულობის ფონზე, რუსულ პოლიტიკურ წრეებში, დახურულ ფორმატებში იზრდება იმის განხილვაც, რომ ვითარების უკიდურესად გამწვავების შემთხვევაში, შესაძლოა, გამოყენებული იქნეს ტაქტიკური ბირთვული იარაღი, როგორც უკანასკნელი ზომა. თუმცა, როგორც Bloomberg აღნიშნავს, ამ დროისთვის არ არსებობს რეალური ნიშნები იმისა, რომ რუსეთი უკრაინაში ბირთვული შეიარაღების გამოყენებისთვის პრაქტიკულ მზადებას აწარმოებს.
