აშშ-ის სენატორთა ჯგუფმა დემოკრატ რიჩარდ ბლუმენტალის ხელმძღვანელობით, ქვეყნის პრეზიდენტს, დონალდ ტრამპს წერილით მიმართა, რომელშიც მოუწოდებს მას, უარი თქვას რუსეთის პრეზიდენტ ვლადიმერ პუტინთან დიზელის გარიგებაზე.
"კონგრესი და ამერიკელი ხალხი მხარს უჭერენ უკრაინის ომის დასრულებას, რომელმაც 4,5 წლის განმავლობაში ასობით ათასი ადამიანის სიცოცხლე შეიწირა, თუმცა მშვიდობა სამართლიან პირობებზე უნდა დაიდოს", - ნათქვამია დოკუმენტში, რომლის ასლიც ბლუმენტალმა თავის X-ის მიკრობლოგზე გამოაქვეყნა.
ხელმომწერთა აზრით, რუსულ დიზელის ექსპორტზე აშშ-ის სანქციების მოხსნა "პუტინს მხოლოდ დამატებით სახსრებს მიაწვდის თავისი სამხედრო მანქანის დასაფინანსებლად და რუსეთს საშუალებას მისცემს, გააგრძელოს სასტიკი თავდასხმები უკრაინელ მშვიდობიან მოქალაქეებზე". "ეს გარიგება ჩვენი მოწინააღმდეგისთვის საჩუქარია, მოკავშირეების მიმართ კი - ღალატი; ის უნდა გაუქმდეს", - აცხადებენ სენატორები.
ისინი მოუწოდებენ ტრამპს, გააძლიეროს ეკონომიკური ზეწოლა "რუსეთსა და მათზე, ვინც მთავარ როლს თამაშობს იმაში, რომ მისი ომი გაგრძელდეს, კერძოდ, ჩინეთზე", გამოიყენოს რა ის უფლებამოსილებები, რომლებიც მას ლინდსი გრემის კანონით მიენიჭა რუსეთისა და ირანის წინააღმდეგ სანქციების შესახებ.
მიმართვას, რომლის ასლები მიიღეს აშშ-ის სახელმწიფო მდივანმა მარკო რუბიომ და ფინანსთა მინისტრმა სკოტ ბესენტმა, ექვსმა დემოკრატმა სენატორმა მოაწერა ხელი. თავად რიჩარდ ბლუმენტალის გარდა, ესენი არიან: ჯინ შაჰინი, რიჩარდ დურბინი, შელდონ უაითჰაუსი, ჯეკ რიდი და კრისტოფერ კუნსი. მათ შეუერთდა ამდენივე რესპუბლიკელიც: მიჩ მაკკონელი, ტომ ტილისი, სიუზან კოლინზი, ალან სტიუარტ არმსტრონგი, ლიზა მურკოვსკი და ჯონ კორნინი.
9 ოქტომბერს აშშ-ის პრეზიდენტმა დონალდ ტრამპმა თავის სოციალურ ქსელ Truth Social-ში რუსეთის პრეზიდენტ ვლადიმერ პუტინთან "უკიდურესად წარმატებული" სატელეფონო საუბრის შესახებ განაცხადა, რომლის დროსაც ორივე ლიდერი შეთანხმდა რუსული დიზელის საწვავის "ამერიკულ და მსოფლიო ბაზარზე" მიწოდებაზე.
თავის მხრივ, აშშ-ის ფინანსთა სამინისტრომ გასცა გენერალური ლიცენზია, რომელიც 2027 წლის აპრილამდე აჩერებს ამერიკული სანქციების მოქმედებას რუსული დიზელის საწვავის მიმართ. "რუსული დიზელის პირველი პარტია სანქტ-პეტერბურგიდან შეერთებული შტატების აღმოსავლეთ სანაპიროსკენ გაემართა. მოსალოდნელია, რომ გემი უახლოესი 48-72 საათის განმავლობაში ჩავა", - იტყობინებოდა 12 ოქტომბერს რუსული საინფორმაციო პროგრამა "ვესტი".
