ამის შესახებ ინფორმაციას „არმენპრესი“ საინფორმაციო სააგენტო „ბლუმბერგზე“ დაყრდნობით ავრცელებს.
ხელოვნური ინტელექტის ტექნოლოგიების შემმუშავებელმა სტარტაპმა Firebird-მა აშშ-ის მთავრობის თანხმობა მიიღო Nvidia-ს ჩიპების სომხეთში ექსპორტისთვის. ეს მას საშუალებას მისცემს განახორციელოს სუპერკომპიუტერული პროექტი, რომელიც ხელოვნური ინტელექტის ინფრასტრუქტურის გაფართოების გლობალური ინიციატივის ნაწილია.
„ინიციატივა, რომელიც Nvidia-მ ივნისში გამოაცხადა, რეგიონში პირველ მასშტაბურ ხელოვნურ ინტელექტზე მომუშავე მონაცემთა ცენტრს შექმნის. ეს 100 მეგავატიანი ობიექტი, 500 მილიონი დოლარის საწყისი ინვესტიციით, Dell Technologies-ის ხელოვნური ინტელექტის სერვერებსა და Nvidia Blackwell-ის პროცესორებს გამოიყენებს. Firebird-ის თანადამფუძნებლის, რაზმიკ ჰოვაკიმიანის თქმით, პირველი ფაზის გაშვება მომავალი წლის მეორე კვარტალშია დაგეგმილი“, - იუწყება Bloomberg.
Firebird-ის სიმძლავრის დაახლოებით 20% სომხურ კომპანიებს გამოიყენებენ, ხოლო დარჩენილი 80% რეგიონში მოქმედ ამერიკულ კომპანიებს მიჰყიდიან. პირველი ფაზა დაფინანსდება Firebird-ის მიერ მოზიდული ვალდებულებებით და კაპიტალით. ჰოვაკიმიანმა აღნიშნა, რომ კომპანიას ასევე მხარს უჭერს Moderna-ს თანადამფუძნებელი ნუბარ აფეიანი.
Firebird ერთ-ერთია Nvidia-ს მრავალი პარტნიორიდან, რომელიც სხვა რეგიონებში მონაცემთა ცენტრების აშენებას ცდილობს. აშშ-ის მთავრობამ თანხმობა გასცა მოწინავე ხელოვნური ინტელექტის ჩიპებზე ექსპორტის შეზღუდვების შემსუბუქების ფონზე.
