ბელგიის ქალაქ ანტვერპენში, ერთ-ერთ შენობაში გაჩენილ ხანძარს, წინასწარი მონაცემებით, ხუთი ადამიანის სიცოცხლე ემსხვერპლა. ინფორმაციას ამის შესახებ ადგილობრივი მედია და სამართალდამცავი უწყებები ავრცელებენ.
ინციდენტი ღამით მოხდა. ხანძრის ჩაქრობის შემდეგ, მაშველებმა შემთხვევის ადგილზე რამდენიმე ცხედარი აღმოაჩინეს. დაღუპულთა ვინაობა და სქესი ჯერჯერობით ოფიციალურად არ დაზუსტებულა, თუმცა ადგილზე ექსპერტ-კრიმინალისტები მუშაობენ.
ადგილობრივი ხელისუფლების განცხადებით, საცხოვრებელ კომპლექსში გაჩენილი ცეცხლი საკმაოდ ძლიერი იყო, რის გამოც შენობიდან მცხოვრებლების ევაკუაცია გახდა საჭირო. რამდენიმე ადამიანი კვამლით ინტოქსიკაციისა და სხვადასხვა დაზიანების გამო საავადმყოფოშია გადაყვანილი.
სპეციალისტები ხანძრის გამომწვევ მიზეზებს სწავლობენ. ჯერჯერობით უცნობია, რა გახდა ტრაგედიის საფუძველი - ტექნიკური გაუმართაობა, უსაფრთხოების წესების დარღვევა თუ სხვა გარემოება.
ადგილობრივი ხელისუფლება მოუწოდებს მოსახლეობას, გაითვალისწინონ ხანძარსაწინააღმდეგო უსაფრთხოების ნორმები.
სამაშველო ოპერაცია ამ დროისთვის დასრულებულია, თუმცა შემთხვევის ადგილი კვლავ შემოსაზღვრულია და მიმდინარეობს ტერიტორიის დეტალური დათვალიერება.
