ინგა გრიგოლია: ვისაც არ მოგწონთ ჩემი პოზიცია დღეს და მერჩით, როდის ვიყავი სხვანაირი? -ნუღა იწუხებთ თავს ჩემი დამუნათებით

“ვისაც არ მოგწონთ ჩემი პოზიცია დღეს და მერჩით, როდის ვიყავი სხვანაირი? – არც არასდროს! ამიტომ ნუღა იწუხებთ თავს ჩემი დამუნათებით. ამ საქმეში, ამ რეალობაში, გზა უკან არ არსებობს. აღარ დაგვიტოვეს”, – ამის შესახებ “ტვ პირველის” ერთერთი ხელმძღვანელი და გადაცემა “რეაქციის” ავტორი ინგრა გრიგოლია სოციალურ ქსელში წერს.

“ვინც არ იცის, რა განცდაა, როცა შენს თანამშრომლებს ასისხლიანებენ, ახალგაზრდებს, პატარებს და საყვარლებს, შვილებივით რომ გყავს და სახელმწიფო თითს არ ანძრევს მათ დასაცავად… როცა ნაცემი ოპერატორი რამდენიმე დღეში გარდაიცვლება, უყურებ, როგორ იტაცებენ ცხედარს და მერე როგორ აშავებენ ბინძური მეთოდებით…. ვინც არ იცის, რას ნიშნავს, როცა შენი გუნდი, ლამის ომში ნამყოფი, ნაცემი და გაბრაზებული, რამდენად შეურაცხყოფილია… ვინც არ იცის, რას ნიშნავს გუნდი და რას ნიშნავს ჟურნალისტური ოჯახი… ვინც არ იცის, ეს რა განცდა და ტკივილია, ის ვერასდროს გაიგებს ჩემს დღევანდელ სადარდებელს და პოზიციას. ამიტომ ნუ იწუხებთ თავს ჩემზე შეტევით)))) არასოდეს, არც ერთი წამით არ მიფიქრია, რომ სპეცოპერაცია, რომელიც ქართულ მედიას მოუწყეს, ასე მშვიდად, ვითომ არაფერი მომხდარა, გამეტარებინა. ეს ის ამბავია, რომელსაც მხოლოდ ერთი გზა აქვს-პასუხი აგოს ყველა დამნაშავემ.!

ვისაც არ მოგწონთ ჩემი პოზიცია დღეს და მერჩით, როდის ვიყავი სხვანაირი? – არც არასდროს! ამიტომ ნუღა იწუხებთ თავს ჩემი დამუნათებით. ამ საქმეში, ამ რეალობაში, გზა უკან არ არსებობს. აღარ დაგვიტოვეს(((((.

მადლობა ყურადღებისთვის”, – წერს ინგა გრიგოლია Facebook – ზე.

“გადადგეს ირაკლი ღარიბაშვილი! დაისაჯოს ყველა მოძალადე!” – პროტესტის ნიშნად, 4 ტელეკომპანიამ: “მთავარი არხი”, “ფორმულა”, “კავკასია” და “ტვ პირველი” მაუწყებლობა 24 საათით შეწყვიტა.

ცნობისთვის, მედიასაშუალებების წარმომადგენლების პროტესტი 5 ივლისს, მოძალადეების მიერ ნაცემი ოპერატორის, ლექსო ლაშქარავას გარდაცვალებას მოჰყვა. 11 ივლისს, დილით, ის დედამ საკუთარ საწოლში გარდაცვლილი იპოვა.

ლექსო ლაშქარავას 5 ივლისის აქციაზე ძალადობრივმა ჯგუფებმა სასტიკად სცემეს, რის შემდეგაც მას ოპერაციაც დასჭირდა.

მისი გარდაცვალების შემდეგ, მედიის წარმომადგენლებმა რუსთაველის გამზირზე აქცია გამართეს და ირაკლი ღარიბაშილის გადადგომა მოითხოვეს, თუმცა პრემიერმა თანამდებობა არ დატოვა.

გარდაცვალებიდან მალევე შინაგან საქმეთა სამინისტრომ თქვა, რომ განიხილავს ნარკოტიკით ზედოზირების ვერსიასაც. ორი დღის განმავლობაში უწყებამ რამდენიმე ბრიფინგი გამართა და რამდენჯერმე ახსენა, რომ გარდაცვალებამდე ალექსანდრე ლაშქარავა ფონიჭალაში იმყოფებოდა.

საბოლოოდ, შსს-მ 12 ივლისს თქვა, რომ ქიმიური ექსპერტიზის შუალედური ანგარიშის თანახმად, ალექსანდრე ლაშქარავას გარდაცვალების მიზეზი, შესაძლოა, ზედოზირება ყოფილიყო.

უწყებას არ უთქვამს, დაადგინა თუ არა სიკვდილის მიზეზი ექსპერტიზამ და გახდა თუ არა სიკვდილის მიზეზი აღმოჩენილი ნივთიერებები. მათ ამის შესახებ მხოლოდ თავიანთი ვარაუდი გაავრცელეს.

როგორც შსს-ში ამბობენ, 5 ივლისს მედიის წარმომადგენლების მიმართ განხორციელებული ძალადობის ფაქტებზე დაწყებული გამოძიების ფარგლებში სამართალდამცველებმა სულ 20 პირი დააკავეს, მათ შორის 5 – ტელეკომპანია „ტვ 1“-ის გადამღებ ჯგუფზე ფიზიკური და სიტყვიერი შეურაცხყოფისთვის. დანაშაულში მონაწილე სხვა პირთა დადგენა-დაკავების მიზნით გრძელდება საგამოძიებო-ოპერატიული ღონისძიებები.

კომენტარები
იტვირთება...