„ქართული ოცნება“ საკუთარ მოსახლეობას თვალში ვერ უყურებს და მასთან ვერ შევა დისკუსიაში - ამის შესახებ „გირჩის“ ლიდერმა, იაგო ხვიჩიამ „ტვ პირველის“ ეთერში განაცხადა.
„ჩვენ ვართ დაპირისპირებული ნაცია, რომელიც მუდმივად ერთმანეთს ებრძვის, ერთმანეთს აბრალებს ხან ვიღაცის აგენტობას, ხან ვიღაცისტობას, ხან უბედურებას. ხელისუფლებებს ამ ქვეყანაში, მოწინააღმდეგეების გალაძღვისა და დაპირისპირების გარდა მეტი არაფერი შეეძლო, რადგან ხელისუფლებაში მოსვლიდან მცირე ხანში კარგავდა სიმართლეს და ის ვეღარ უყურებდა თვალში საკუთარ მოსახლეობას, ისევე როგორც დღეს „ქართული ოცნება“ ვერ უყურებს თვალში საკუთარ მოსახლეობას და მასთან ვერ შევა დისკუსიაში. ვერცერთი სახელისუფლებო ლიდერი ვერ გავა ხალხის მასაში, ანუ საპროტესტო მასაში, რომელიც რაღაცას აპროტესტებს და ვერ აუხსნის მას, რომ სწორად იქცევა, იმიტომ რომ სწორად არ იქცევა“ - განაცხადა იაგო ხვიჩიამ.
