პარტია „ხალხის ძალის“ აღმასრულებელი მდივანი გურამ მაჭარაშვილი ევროპარლამენტის არჩევნების შედეგებს სოციალურ ქსელში ეხმიანება.
დეპუტატის თქმით, არჩევნების შედეგებმა აჩვენა, რომ ევროპელი ხალხი არ დაეთანხმა აშშ-ის კონგრესმენების განმარტებას, რომლის მიხედვითაც ომი ძლიერი დემოკრატიაა, მშვიდობა - სუსტი.
„ევროპარლამენტის არჩევნებმა აჩვენა, რომ ევროპელი ხალხის უმრავლესობა არ დაეთანხმება ამერიკელი კონგრესმენების მიერ ევროპული ღირებულებების ისეთ განმარტებას, რომლის მიხედვით ომი ძლიერ დემოკრატიად უნდა წარმოჩნდეს, ხოლო მშვიდობის შენარჩუნება დემოკრატიის სისუსტედ,
ლგბტ პროპაგანდა სახელმწიფოს სულიერ მისიად უნდა გამოცხადდეს, ხოლო ტრადიციები და სარწმუნოება წარსულს უნდა ჩაჰბარდეს.
სწორედ ამიტომ, ევროპულმა საზოგადოების უმრავლესობამ ამ არჩევნებით აჩვენა მსოფლიოს ე ვ რ ო პ ე ლ ი ხ ა ლ ხ ი ს ძ ა ლ ა ევროპაში !!“
შეგახსენებთ, ევროპული სააგენტოები ევროპარლამენტის არჩევნების შედეგების წინასწარ მონაცემებს აქვეყნებენ. ევროპარლამენტის არჩევნების წინასწარი შედეგების მიხედვით, მემარჯვენე ცენტრისტული ევროპის სახალხო პარტია რჩება უდიდეს პოლიტიკურ ძალად და აძლიერებს თავის პოზიციას. ევროპარლამენტის ახალ შემადგენლობაში მას 720-იდან 184 ადგილი ექნება, 8-ით მეტი, ვიდრე 2019 წლის ევროპარლამენტში ჰქონდა.
