გიორგი ამილახვარი: 27 000-მდე სტატუსშეჩერებულ სტუდენტს 30 მილიონ ლარამდე დავალიანება ჩამოეწერათ

ამილახვარმა პარლამენტში, „მინისტრის საათის“ ფორმატში გამოსვლისას განაცხადა, განახლებული პროგრამის ფარგლებში სასწავლო წლის 10 თვის განმავლობაში, ოქტომბრიდან ივლისის ჩათვლით, სახელმწიფო უმაღლესი საგანმანათლებლო დაწესებულებების წარმატებული სტუდენტები ყოველთვიურად 150 ლარის ნაცვლად, იღებენ 300-ლარიან სტიპენდიას.

„აქამდე სტიპენდია თუ გაიცემოდა საშუალოდ 2 500 სტუდენტზე, 2023-2024 სასწავლო წლიდან გაზრდილ სტიპენდიას 5 000 წარმატებული სტუდენტი იღებს“, – აღნიშნა ამილახვარმა.

მისივე განმარტებით, საქართველოს მთავრობამ ასევე მიიღო გადაწყვეტილება ფინანსური დავალიანების მიზეზით სტატუსშეჩერებული სტუდენტებისთვის არსებული დავალიანების განულების თაობაზე.

გიორგი ამილახვრის განცხადებით, გადაწყვეტილება ეხება საჯარო და კერძო უნივერსიტეტების, საქართველოს მოქალაქე დაახლოებით 27 000 სტუდენტს, რომელთაც არსებული დავალიანება – ჯამში 30 მილიონ ლარამდე ჩამოეწერათ.

ამავდროულად, გიორგი ამილახვარმა განაცხადა, რომ 2023 წელს განათლების საერთაშორისო ცენტრმა, საზღვარგარეთ სწავლის მიზნით, საქართველოს 191 მოქალაქე დააფინანსა. ასევე, მაღალი აკადემიური მოსწრების საფუძველზე დაფინანსება გაუგრძელა გასულ წელს გამარჯვებულ 34 სტიპენდიატს. მინისტრის ინფორმაციით, ჯამურმა ღირებულებამ 5.8 მილიონი ლარი შეადგინა.