ირანი ისრაელს თავდასხმაზე პასუხის შემთხვევაში უფრო მასშტაბური დარტყმით ემუქრება.
"1 ოქტომბერს ისრაელზე განხორციელებული სარაკეტო შეტევა მიმართული იყო მხოლოდ სამხედრო ობიექტების წინააღმდეგ და თუ ისრაელი ირანს თავს დაესხმება, პასუხად მიიღებს გაცილებით დიდი ინტენსივობის შეტევას და ამჯერად სამიზნე იქნება ისრაელის მთელი ინფრასტრუქტურა", – განაცხადა ირანის ისლამური რესპუბლიკის შეიარაღებული ძალების გენერალური შტაბის უფროსმა, გენერალ-მაიორმა მოჰამად ბაღერიმ.
ირანელი გენერლის განცხადებით, "თეირანში "ჰამასის" ლიდერის ისმაილ ჰანიეს მკვლელობის შემდეგ თავშეკავება გამოიჩინეს, მაგრამ როცა ისრაელმა ლიბანში მოკლა "ჰეზბოლას" ლიდერი ჰასან ნასრალაც და სხვები, სიტუაცია აუტანელი გახდა".
ისრაელს თავდასხმაზე პასუხის შემთხვევაში შემდგომი ზომებით ირანის საგარეო საქმეთა მინისტრი აბას არაქჩიც დაემუქრა. მან სოციალურ ქსელში დაწერა, რომ "ირანის ქმედებები დასრულებულია, თუ ისრაელის რეჟიმი არ გადაწყვეტს საპასუხო ზომების მიღებას". არაქჩის თქმით, ამას ირანისგან უფრო გადამწყვეტი პასუხი მოჰყვება.
ისრაელის არმიის წინასწარი მონაცემებით, ირანმა ისრაელის მიმართულებით 180 რაკეტა ისროლა.
ირანის ცნობით, მისი გუშინდელი სარაკეტო იერიშის სამიზნე თელ-ავივთან მდებარე სამი სამხედრო ბაზა იყო.
ისრაელის არმიაში აცხადებენ, რომ ირანის მიერ ნასროლი რაკეტების ნაწილი სამიზნემდე მიღწევამდე ჩამოაგდეს, ზოგიერთი კი ქვეყნის ცენტრალურ და სამხრეთ ნაწილში აფეთქდა.
ისრაელი ირანს საპასუხო ზომებით ემუქრება.
ისრაელმა ნება დართო ადგილობრივებს, დატოვონ თავშესაფრები.
დასავლეთის ლიდერების ნაწილმა ირანის მიერ ისრაელზე განხორციელებული თავდასხმა უკვე დაგმო.
