დიდმა ბრიტანეთმა რუსულ ბიზნესთან დაკავშირებულ 29 ფიზიკურ და იურიდიულ პირს სანქციები დაუწესა. როგორც ბრიტანეთის საგარეო საქმეთა სამინისტროს მიერ გავრცელებულ განცხადებაშია აღნიშნული, ლონდონი მიიჩნევს, რომ მათ კავშირი აქვთ უკრაინაში რუსეთის ომის დაფინანსებასთან.
სანქციები შეეხო რუსეთში ოქროს უმსხვილეს მომპოვებელ კომპანიებს – დიდ ბრიტანეთში რეგისტრირებულ Highland Gold Mining Ltd.-ს და Severstal-თან აფილირებულ Nordgold-ს, Krastsvetmet-სა და რუსეთის მრეწველებისა და მეწარმეთა კავშირს.
პირადი სანქციები შეეხოთ მსხვილ ბიზნესმენებს, კერძოდ, Highland Gold-ისა და Ecopolis-ის მთავარ აქციონერ ვლადისლავ სვიბლოვს, Yuzhuralzoloto-ს პრეზიდენტ კონსტანტინ სტრუკოვს, მილიარდერ ალექსეი მორდაშოვის მეუღლეს და ბიზნესპარტნიორ მარინა მორდაშოვას, უძრავი ქონების მენეჯერებს სერგეი და ვადიმ ტრეგუბებს.
ტრეგუბის ბიძა და ძმისშვილი ადრე გახდნენ გახმაურებული გამოძიების გმირები, რომელსაც ალექსეი ნავალნის გუნდი აწარმოებდა გამოცემა „პროექტთან“ ერთად. გამომძიებლები აცხადებენ, რომ მათ სამართავად მიიღეს სხვადასხვა უძრავი ქონება, რომლის საერთო ღირებულება მილიარდ დოლარს აღემატება და რომლის რეალური მომხმარებელია „გაზპრომის“ ხელმძღვანელი ალექსეი მილერი.
საერთაშორისო ანტიკორუფციული ფონდის თავმჯდომარე მარია პევჩიხი სოციალურ ქსელ X-ში ტრეგუბების წინააღმდეგ დაწესებულ სანქციებს ასე გამოეხმაურა: „შესანიშნავი ამბავია“.
მთლიანობაში ამჟამად გაერთიანებული სამეფოს სანქციების სიაში რუსულ ბიზნესთან დაკავშირებული 1800-ზე მეტი ფიზიკური პირი და კომპანიაა.
