თბილისის საკრებულოს ჩუღურეთის რაიონის მაჟორიტარმა დეპუტატმა რიმა ბერაძემ გოგი დოლიძის ქუჩაზე მიმდინარე საგზაო სამუშაოები ჩუღურეთის რაიონის გამგებელთან ზურაბ ჩიკვილაძესთან და გამგებლის მოადგილესთან ავთანდილ ნარიმანიძესთან ერთად დაათვალიერა. აღნიშნულ ქუჩა ზე 3000 კვადრატულ მეტრზე ძველ ამორტიზებულ გზას ასფალტის ორფენიანი საფარი ჩაანაცვლებს.
როგორც რიმა ბერაძემ განაცხადა, ჩუღურეთის რაიონში საგზაო ინფრასტრუქტურის მოწესრიგება აქტიურად მიმდინარეობს, რაც მოსახლეობისათვის მიცემული წინასაარჩევნო დაპირება იყო.
„ეს არის თბილისის ერთ-ერთი კოლორიტული ქუჩა, სადაც წლების განმავლობაში არაფერი გაკეთებულა. ჩვენი უმთავრესი ამოცანა იყო აქ გზა დაგვეგო. რა თქმა უნდა, მოვაწესრიგეთ წყალარინების სისტემაც. ზოგადად, ყველგან, უპირველესად ვცვლით მიწისქვეშა კომუნიკაციებს.
ჩვენ დავასრულეთ საგზაო ინფრასტუქტურული სამუშაოები გოგოლის ქუჩაზე და დღეს გადმოვედით აქ, სადაც უკვე ქუჩის მოპირკეთება მიმდინარეობს“, - აღნიშნა დეპუტატმა.
პროექტის ფარგლებში, რომლის ღირებულება 80 000 ლარია, ასევე, მოეწყო ბორდიურები და საფეხმავლო ბილიკი.
