ვფიქრობ, ინდოეთში ვიზიტი ქვეყნებს შორის ურთიერთობებს კიდევ უფრო დააახლოებს, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს ინდოეთში ვიზიტთან დაკავშირებით განუცხადა.
„ხაზგასასმელია, რომ ეს ვიზიტი საქართველო-ინდოეთის ორმხრივი ურთიერთობების ისტორიაში პირველი მაღალი დონის ვიზიტია. მნიშვნელოვანია, რომ ქვეყნებს შორის მაღალი დონის ვიზიტების გაცვლას საფუძველი ჩაეყაროს, ასევე პარლამენტებს შორის საქმიან ურთიერთობას კომიტეტების მიმართულებების მიხედვით. ჩვენი დღევანდელი შეხვედრები ძირითადად ეკონომიკურ ურთიერთობებს დაეთმობა. ინდოეთი მსოფლიოში ერთ-ერთი უდიდესი ეკონომიკაა და მნიშვნელოვანია, რომ საქართველო, როგორც შუა დერეფნის ძირითადი როლი, იყოს საინტერესო ინდოეთისთვის ევროპასთან დასაკავშირებლად. პარლამენტები ყოველთვის მნიშვნელოვან როლს ასრულებენ, რათა შესაბამისი პოლიტიკური გარემო შექმნან, მათ შორის ეკონომიკური ურთიერთობებისთვის. ვფიქრობ, რომ ეს ვიზიტი ქვეყნებს შორის ურთიერთობებს კიდევ უფრო დააახლოებს“, – განაცხადა შალვა პაპუაშვილმა.
