„საკითხის დაყენება ვიზალიბერალიზაციასთან დაკავშირებით იმდენად სპეკულაციურია, რომ გარდა არსებული ვერსიისა, მდგომარეობს იმაში, რომ საქართველოდან ნაც აგენტურის წარმომადგენლები იხვეწებიან, რომ არანაირი მაშველი რგოლი, არც ზელენსკის სანქციები, არც სტრატეგიული პარტნიორობის შეჩერება აშშ-ის მხრიდან არ არის იმდენად ღირებული მათთვის, რამდენადაც ღირებული შეიძლება იყოს, ვციტირებ: საუბრის დაწყებაც კი, ვიზალიბერალიზაციის შეჩერებაზე. – ამის შესახებ საპარლამენტო უმრავლესობის ლიდერმა, მამუკა მდინარაძემ ბრიფინგზე განაცხადა.
"მათ იციან, რომ ოთხი სამართლებრივი საფუძველი, რომელთაგანაც არცერთი ბუნებაში ფიზიკურად არ არსებობს, რა თქმა უნდა, საქართველოსთან დაკავშირებით მით უმეტეს არ არსებობს, ასეთი პრეცედენტი ჯერ არ ყოფილა. ვინაიდან არც პრეცედენტი ყოფილა და სამართლებრივი საფუძველი ამ ოთხიდან არცერთი არ არსებობს, ესე იგი, ვიზალიბერალიზაციის შეჩერება არის პრაქტიკულად გამორიცხული რამ. თუმცა, საუბრის დაწყებას წინ არაფერი უდგას და ამას მიიჩნევენ ისინი მაშველ რგოლად, რომ საქართველოში მოასწრონ აშშ-ის პრეზიდენტის ინაუგურაციამდე სიტუაციის ადუღება – ამას ემსახურება საუბრის დაწყების მოთხოვნა და მიზანი. შესაბამისად, რამდენად სპეკულაციურია, ყველა ხვდება. მეორე მხრივ, ჩვენ უნდა ვიცოდეთ, რომ როდესაც ამ საკითხს აყენებენ დღის წესრიგში და მას მოსდევს „გამჭვირვალობის“ და „ოჯახური ღირებულებების“ კანონების გაუქმების მოთხოვნა, არარეალურია, მაგრამ რეალურიც რომ იყოს, რომ „ან დაუშვით სკოლებში, ბაღებში ლგბტ პროპაგანდა, ან გაგიუქმებთ,“ – მგონი აქ პასუხი ნათელია, ასე საკითხი არ დადგება, მაგრამ ვერც დადგება. აქ არჩევანი არის ძალიან მარტივი, თუმცა აქ საკითხი ვერ დადგება პრაქტიკული გადაწყვეტის თვალსაზრისით, სალაპარაკოდ ამაზე ბევრმა შეიძლება, ილაპარაკოს“, – განაცხადა მდინარაძემ.
ევროკომისიამ „ვიზალიბერალიზაციის შესახებ“ ანგარიში გამოაქვეყნა. ანგარიში ევროკავშირთან უვიზო რეჟიმის მქონე ქვეყნების, მათ შორის, საქართველოს მიერ ვიზალიბერალიზაციის პირობების შესრულების შეფასებას მოიცავს. „საქართველოში ბოლო დროს განვითარებული მოვლენების გათვალისწინებით, მიმდინარეობს განხილვა გარკვეული კატეგორიის პირებთან მიმართებით სავიზო რეჟიმის შეჩერების მექანიზმის შესაძლო გააქტიურების შესახებ. იმისათვის, რომ საქართველომ გააგრძელოს ვიზალიბერალიზაციის ყველა კრიტერიუმის შესრულება და თავიდან აიცილოს შეჩერების მექანიზმის შესაძლო გააქტიურება, უნდა იქნეს მიღებული გადაუდებელი ზომები ევროკომისიის რეკომენდაციების შესასრულებლად,“ – ნათქვამია ევროკომისიის ანგარიშში.
