ბატონო ანრი, შეურაცხყოფა ისეთმა ადამიანმა უნდა მომაყენოს, რომელიც თვითონ რამეს წარმოადგენს, ამიტომ არცერთი ჩვენგანი შეურაცხყოფას არ მიიღებს ბიძინა ივანიშვილის მსახურისგან - თავდაცვის სამინისტროში დავით ხიდაშელის დამნიშნავი პოლიტიკური ძალა მე მელაპარაკება ღალატზე? - ასე უპასუხა „ევროოპტიმისტების“ დეპუტატმა ხატია დეკანოიძემ იურიდიული კომიტეტის თავმჯდომარეს, ანრი ოხანაშვილს, რომელმაც პარლამენტში ხატია დეკანოიძესთან სიტყვიერი დაპირისპირებისას მოითხოვა, რომ ტელემედიამ გადაიღოს, თუ "როგორ გამოიყურება ღალატის სახე".
ხატია დეკანოიძის განმარტებით, „ქართული ოცნება“ გამჭვირვალობაზე საუბრობს, თუმცა როდესაც რამდენჯერმე შემოსავლების სამსახურს „ქართუსთან“ დაკავშირებით წერილით მიმართა, პასუხი არ მიუღია.
„მე შარშან სამჯერ გავაგზავნე შემოსავლების სამსახურში წერილი „ქართუსთან" დაკავშირებით. თუ გამჭვირვალობაზეა საუბარი, მე შემოსავლების სამსახურმა რატომ არ გამომიგზავნა წერილი და რატომ არ მოახსენა საქართველოს პარლამენტს, რით არის დაკავებული „ფონდი ქართუ“? სად არის ეს წერილი? თუ ბიძინა ივანიშვილის გამჭვირვალობაზე არ ზრუნავთ?“ - განაცხადა ხატია დეკანოიძემ.
