„ჩემთვის დიდი პატივია, თქვენთან ერთად აღვნიშნო დღე, რომელიც ჩვენი ქვეყნის დამოუკიდებლობისა და თავისუფლებისთვის საუკუნოვანი ბრძოლის სიმბოლური თარიღია. ეს დღე თითოეული ქართველისთვის მნიშვნელოვანი, ჩვენი ეროვნული იდენტობის ერთ-ერთი საყრდენი მოვლენაა. დღევანდელი დღე მინდა მივულოცო საქართველოს ყველა მოქალაქეს, ჩვენი საზოგადოების ყველა წევრს, ჩვენს აფხაზ და ოს თანამოქალაქეებს, ყველას ვისაც გვაერთიანებს საერთო ისტორია და აუცილებლად გვექნება საერთო, ღირსეული მომავალი“, - განაცხადა თავდაცვის მინისტრმა ჯუანშერ ბურჭულაძემ საქართველოს დამოუკიდებლობის დღისადმი მიძღვნილ ოფიციალურ ღონისძიებაზე.
„განსაკუთრებით მინდა მივულოცო დამსახურებულ ვეტერანებს და ჩვენი ჯარის მოქმედ სამხედრო მოსამსახურეებს, რომლებიც საქართველოს პირველი დემოკრატიული რესპუბლიკის დამცველების მხედრულ ტრადიციებს სამაგალითოდ აგრძელებენ და ყოველდღე ამტკიცებენ, რომ წინაპრების ღირსეული შვილები არიან. მინდა ასევე მივესალმო და ეს დღე მივულოცო ჩვენს ახალწვეულებს, რომლებმაც სწორედ დღეს დადეს ფიცი და შეუერთდნენ თავდაცვის ძალების დიდ ოჯახს.
მინდა ქედი მოვიხარო ჩვენი დაღუპული გმირების ხსოვნის წინაშე. სწორედ მათმა თავგანწირვამ და უდრეკმა სულისკვეთებამ შექმნა ჩვენი სახელმწიფოებრიობა და დამოუკიდებლობა“, - განაცხადა ჯუანშერ ბურჭულაძემ.
ჯუანშერ ბურჭულაძემ მისალოც სიტყვაში ყურადღება, ასევე, გაამახვილა კიდევ უფრო ძლიერი და ეფექტური დემოკრატიული სახელმწიფო ინსტიტუტების შექმნის, ქვეყნის უსაფრთხოებისა და მშვიდობის განმტკიცების მნიშვნელობაზე.
