ნებისმიერ ადამიანს დღეს შეუძლია, იყიდოს 100 ევროდ ბილეთი, გაფრინდეს ევროპაში და მეორე დღეს წამოვიდეს საქართველოში. ეს ვინ გააკეთა მეგობრებო? „ქართულმა ოცნებამ“, ეს გააკეთა ბიძინა ივანიშვილმა და მისმა გუნდმა, - ამის შესახებ საქართველოს პრემიერ-მინისტრმა ირაკლი ღარიბაშვილმა, ტელეკომპანია „იმედის“ ეთერში განაცხადა.
„რაც შეეხება ზოგადად, ევროპის იდეას, მინდა, კიდევ ერთხელ ავუხსნა პირველ რიგში, ჩვენს ახალგაზრდებს, მათ მივმართო. ჩემო შვილებო, ჩემო დებო და ძმებო, გავიხსენოთ, საიდან დაიწყო ზოგადად ჩვენი ქვეყნის ევროინტეგრაციის გზაზე რეალური, ხელშესახები პროგრესი. ვინ მოიტანა რეალური პროგრესი. სააკაშვილმა? ნამდვილად არა. რატომ - სააკაშვილი იყო ერთ-ერთი ყველაზე ანტი ევროპული თავისი ბუნებით, თავისი მმართველობის სტილით. შეშლილი დიქტატორი, რომელიც მართავდა ჩვენს ქვეყანას ბრუტალური, სასტიკი მეთოდებით. აწამებდა, კლავდა ხალხს ახალგაზრდებს მათ შორის. 300 000 ადამიანი გაასამართლა. მისი გუნდის წევრები იყვნენ მერაბიშვილი, მკვლელი, ახალაიები, მწამებლები, მეგის ქარდავა და რეკეტიორი კეზერაშვილი. დღეს იგივე ხალხი უპირისპირდება ჩვენი ქვეყნის მშვიდობას. ჩვენი მოქალაქეების, ჩვენი შვილების უსაფრთხოებას, ჩვენს ევროპულ მომავალს.
ახლა ვუბრუნდები 2012 წელს. მაშინ ხელისუფლებაში მოვიდა ბიძინა ივანიშვილი და მოიყვანა „ქართული ოცნება“. ძალიან კარგად ვიცით ბიძინა ივანიშვილს მანამდე რა გაუკეთებია, ამაზე აღარ შევაჩერებ თქვენს ყურადღებას, კაცმა, რომელმაც სამი მილიარდი თავისი ჯიბიდან გადაიხადა და ძალიან ბევრი მაგარი საქმე გაუკეთა ჩვენს ქვეყანას. რეალურად, მან დააბრუნა ჩვენი ქვეყანა დემოკრატიული განვითარების გზაზე. აცდენილი იყო საერთოდ, გახსოვთ, რომ სააკაშვილის მთავარი იდეა იყო, არა ევროპასთან ინტეგრაციის დაჩქარება, შეგახსენებთ, რომ სამი წლის დაგვიანებით დავიწყეთ ჩვენ ასოცირების შეთანხმებაზე მუშაობა. რატომ? ამათ გადადებული ჰქონდათ. ისევე, როგორც უვიზო რეჟიმზე მუშაობა. ჩვენ დავიწყეთ, ჩვენ გადმოგვეცა, მე ვიყავი მაშინ შინაგან საქმეთა მინისტრი და მე გადმომეცა სწორედ ეს ვიზა ლიბერალიზაციის სამოქმედო გეგმა. რა გააკეთა „ქართულმა ოცნებამ“ ევროინტეგრაციის გზაზე, რომ იძახიან, რომ ევროპა გვინდა. ყველას გვინდა ევროპა. შევახსენოთ მაშინ საზოგადოებას და ჩვენს ახალგაზრდებს, ვინ მოაწერა ხელი ასოცირების შეთანხმებას. მე მოვაწერე ხელი „ქართული ოცნების“ სახელით. თავისუფალ ვაჭრობას ვინ მოაწერა? რომ ჩვენმა მოქალაქეებმა, ბიზნესმენებმა შეძლონ, ყოველგვარი გადასახადების გარეშე, ნულოვანი ბეგარით პროდუქციის გატანა. მანამდე გახსოვთ, რომ ვიზის ასაღებად რამხელა რიგები იდგა საკონსულოებში. ბევრი მაგალითი ვიცი ღირსების შემლახავი საქციელებიც კი ხდებოდა საკონსულოებში. არ აძლევდნენ ვიზებს და არ ენდობოდნენ ჩვენს მოქალაქეებს.
ჩვენმა ხელისუფლებამ გააკეთა ჩემო ძმებო და დებო, ჩემო შვილებო, ჩემო მეგობრებო. ჩვენმა ხელისუფლებამ გააკეტა ის, რომ ჩვენი ქვეყანა აღიარეს, როგორც სანდო პარტნიორი. როდის მოხდა ეს? 2015 წლის 17 დეკემბერს , როცა საბოლოოდ, ჩემი მეთაურობით, მაშინ პირველი პრემიერ-მინისტრობის დროს დაიხურა ყველა ვალდებულება და ქვეყანამ დაიწყო უვიზოდ მიმოსვლა ევროპაში. არა მხოლოდ ელიტამ, სააკაშვილის ელიტამ ან სხვა შეძლებულმა ფენამ, არამედ, ნებისმიერ ადამიანს დღეს შეუძლია, იყიდოს 100 ევროდ ბილეთი, გაფრინდეს ევროპაში და მეორე დღეს წამოვიდეს საქართველოში. ეს ვინ გააკეთა მეგობრებო? „ქართულმა ოცნებამ“. ეს გააკეთა ბიძინა ივანიშვილმა და მისმა გუნდმა.
