პოლიტიკური კონტექსტი გამოძიებისგან არ მომდინარეობს, არამედ არასამთავრობო ორგანიზაციების საქმიანობიდან, ისინი თავიანთი წესდების ყველანაირ ჩარჩოს გასცდნენ, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
მისი თქმით, პროკურატურა იმ საკითხს იხილავს, რაც პირდაპირ დაკავშირებულია ეროვნული უსაფრთხოების საკითხებთან.
"საქართველოში ქალთა უფლებები უნდა დაიცვა და შეიძლება, რუსთაველის გამზირზე დგომისას არაკორექტული სიტყვებიც გამოიყენო, რაც ქალთა უფლებებს შეურაცხყოფს, მაგრამ თანხები რადიკალური ქმედებების დაფინანსებისთვის რომ გამოიყენო, ეს პოლიტიკურ კონტექსტში განსახილველი თემა არ არის. პროკურატურა იმ საკითხს იხილავს, რაც პირდაპირ დაკავშირებულია ეროვნული უსაფრთხოების სალითხებთან. საოცრებაა, რომ ამ თემებში ჩართული არასამთავრობო ორგანიზაციები არიან. უფრო მეტი საოცრება ის არის, რომ ისინი იმ პოზიციით კი არ გამოდიან, რომ თავიანთი პროგრამები, ხარჯები დაასახელონ და გამჭვირვალეები იყვნენ, არამედ იმ ბრალდებებით გამოდიან, როგორც ამას აქციებზე აკეთებდნენ, როცა არასამთავრობო ორგანიზაციებით სახელმწიფო ინსტიტუტების ჩანაცვლებას ითხოვდნენ“, – განაცხადა გია ვოლსკიმ.
მისივე თქმით, პროკურატურას უტყუარი ცნობები აქვს, რომ არასამთავრობო ორგანიზაციების ფინანსები გამოყენებული იყო იმ რადიკალური აქციების დროს, რასაც შეჯახება, პარლამენტის შენობის გადაწვის მცდელობა და ის უამრავი დარღვევა მოჰყვა, რაც დაკავშირებულია რევოლუციურ სცენართან.
„ეს თავად ამ ორგანიზაციებმა შეადგინეს. სცენარი პოლიციაზე შეტევას, ფიზიკურ დაპირისპირებას, პოლიციის გამოწვევას და ისეთი შედეგის მიღებას ითხოვნენ, რაზეც თავის მოსაზრებას არ მალავდნენ, რომ პროცესი სისხლისღვრამდე უნდა მისულიყო და შედეგი ვინმეს დაღუპვა უნდა ყოფილიყო. ეს ის სცენარი უნდა ყოფილიყო, პროცესი როგორც მეიდანზე განვითარდა“, – განაცხადა გია ვოლსკიმ.
ცნობისთვის, პროკურატურაში მიმდინარე გამოძიების ფარგლებში რამდენიმე არასამთავრობო ორგანიზაციის საბანკო ანგარიშებს ყადაღა დაედო.
