პარლამენტის წევრი, დეპუტატი ეკა სეფაშვილი „ქართული ოცნების“ განცხადებას სოციალურ ქსელში ეხმიანება. მისი თქმით, განცხადებაში ნათქვამია, რომ საქართველო ასოცირების ხელშეკრულებით ნაკისრ ვალდებულებებს გააგრძელებს და ეს პროცესი არც ერთი დღით არ შეწყდება, 2030 წელს კი საქართველო მზად იქნება ევროკავშირის წევრობისათვის.
„ქვეყანაში მშვიდობისა და სტაბილურობის შედეგად მიღწეული მაღალი ეკონომიკური ზრდა და ბიუჯეტის მოცულობა საშუალებას გვაძლევს ყველა რეფორმა, რომელიც ევროინტეგრაციას ემსახურება, ქართული სახელმწიფოს მიერ დაფინანსდეს“- წერს ეკა სეფაშვილი სოციალურ ქსელში და განმარტავს, რომ ევროინტეგრაციის მომდევნო ეტაპის განახლებამდე მნიშვნელოვანია რადიკალებს ევროინტეგრაციით სპეკულაციის საშუალება არ მიეცეთ.
„კარგ მთქმელს კარგი გამგონე უნდა!
ჩვენს განცხადებაში ხაზგასმით არის აღნიშნული, რომ საქართველო განუხრელად აგრძელებს ასოცირების ხელშეკრულებით ნაკისრი ვალდებულებების შესრულებას. და ეს პროცესი, არც ერთი დღით, არც შეწყვეტილა და არც შენელებულა და ასევე გაგრძელდება!
შედეგად, საქართველო 2030 წლისათვის ყველა კანდიდატ ქვეყანაზე მეტად იქნება მზად ევროკავშირის წევრობისათვის.
2028 წლამდე ჩვენ არ ვთხოვთ ევროკავშირს წევრობაზე მოლაპარაკების გახსნას. თუმცა თუ ევროკავშირი მანამდე გაგვიხსნის მოლაპარაკებას, საქართველო მზად არის დაიწყოს მოლაპარაკებები!
მანამდე კი, ქვეყნის შიგნით თუ ქვეყნის გარეთ, საქართველოს მტრებს და რადიკალებს არ მივცემთ საშუალებას წევრობაზე მოლაპარაკების დაწყება/არ დაწყება პოლიტიკურ იარაღად გამოიყენონ ჩვენი ქვეყნის წინააღმდეგ და მუდმივად შეუშალონ ხელი ქვეყანაში მშვიდობას, უსაფრთხოებას და სტაბილურობას.
ამავე მიზეზით, უარს ვამბობთ ევროკავშირის საბიუჯეტო გრანტებზე. ქვეყანაში მშვიდობისა და სტაბილურობის შედეგად მიღწეული მაღალი ეკონომიკური ზრდა და ბიუჯეტის მოცულობა საშუალებას გვაძლევს ყველა რეფორმა, რომელიც ევროინტეგრაციას ემსახურება, ქართული სახელმწიფოს მიერ დაფინანსდეს.
და გვახსოვდეს, ევროკავშირს სწორედ ისევე სჭირდება საქართველო, როგორც საქართველოს ევროკავშირი.
ეროვნული ღირსების შენარჩუნებით და ეროვნული ინტერესების დაცვით, მშვიდობისა და სტაბილურობის შენარჩუნებით საქართველო აუცილებლად გახდება ევროკავშირის წევრი, როცა ევროკავშირი თავადვე იქნება მზად მორიგი გაფართოებისთვის!
P.S. მადლობა ჩვენს სამართალდამცავებს სამშობლოს სტაბილურობის და უსაფრთხოებისათვის ბრძოლაში გამოჩენილი სიმამაცისათვის და თავდადებისათვის!“- წერს ეკა სეფაშვილი სოციალურ ქსელში.
ცნობისთვის, ცოტა ხნის წინ, რუსთველი გამზირზე, დასუფთავების სამსახურის წარმომადგენლები იმყოფებოდნენ, რომლებმაც მიმდებარე ტერიტორია გაწმინდეს. ტერიტორიაზე დემონსტრანტები აღარ იმყოფებიან, თუმცა საპოლიციო დანაყოფების ნაწილი ადგილზე რჩებიან.
რუსთაველის გამზირზე საპროტესტო აქციის დროს დაშავდნენ ჟურნალისტები, ოპერატორები და შსს-ს თანამშრომლები.
შეგახსენებთ, შსს-მ პარლამენტთან მიმდინარე აქციის დასაშლელად წყლის ჭავლი გამოიყენა.
მანამდე კი შსს-მ გაავრცელა განცხადება, სადა ნათქვამი იყო აქცია გასცდა მანიფესტაციის კანონით დადგენილ ნორმებს, დაემორჩილეთ სამართალდამცველთა მითითებებს, წინააღმდეგ შემთხვევაში, გამოვიყენებთ სპეციალურ საშუალებებს.
საქართველოს პრემიერმინისტრმა ირაკლი კობახიძემ განაცხადა, რომ "მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკებების გახსნის საკითხი ". რასაც საპროტესტო აქცია მოჰყვა.
