"რამდენიმე კვირაა დარჩენილი არჩევნებამდე და გარდამავალი პერიოდისთვის უნდა მოვემზადოთ. ეს დრო უნდა გამოვიყენოთ, რომ ცაიტნოტში არ მოვყვეთ", - ამის შესახებ კოალიცია "ძლიერი საქართველოს" ერთერთმა ლიდერმა ანა დოლიძემ ჟურნალისტებს სალომე ზურაბიშვილთან გამართული შეხვედრის შემდეგ განუცხადა.
"პრეზიდენტი ახლა დაბრუნდა დასავლეთიდან, შეხვდა პარტნიორებს და ბუნებრივია, ახლა ძალიან მნიშვნელოვანი შიდა პოლიტიკური პროცესები იწყება. პრეზიდენტის შუამავლობით პოლიტიკური კონსულტაციებიც დაიწყება პოლიტიკურ პარტიებს შორის. საუბარია, როგორი კონტურები უნდა ჰქონდეს ამ პროცესს, ამას კი პრეზიდენტის მონაწილეობა სჭირდება. ეს არის პროცესი, სადაც პოლიტიკური პარტიები მთავარ როლს ვთამაშობთ. რამდენიმე კვირაა დარჩენილი არჩევნებამდე და გარდამავალი პერიოდისთვის უნდა მოვემზადოთ. ეს დრო უნდა გამოვიყენოთ, რომ ცაიტნოტში არ მოვყვეთ. ვინ იქნება ამ პროცესებში, რა როლი ექნება პრეზიდენტს და რა როლს დავიკავებთ პოლიტიკური პარტიები, ამას მომზადება სჭირდება.
რაც შეეხება დასავლელ პარტნიორებს, ყურადღება არის დიდი, რომ საქართველოში იყოს მშვიდობიანი, სამართლიანი, დემოკრატიული და გარდამავალი არჩევნები. პრეზიდენტის თქმით, ჩვენი პარტნიორები გვიდგანან გვერდით და გვაქვს მათი, როგორც პოლიტიკური, ასევე მატერიალური მხარდაჭერა. პრეზიდენტი გარკვეული ხიდია შიდა პოლიტიკურ პროცესებზე ჩვენსა და დასავლელ პარტნიორებს შორის. პრემიერ-მინისტრობის შესაძლო კანდიდატებზე საუბარი არ ყოფილა და სწორიც არ მგონია, რადგან საარჩევნო კამპანიიდან ყურადღება, კონკრეტულ პირებზე არ უნდა გადავიდეს“, – განაცხადა ანა დოლიძემ
ცნობისათვის: პრეზიდენტის სასახლეში საქართველოს პრეზიდენტი სალომე ზურაბიშვილი ოპოზიციის წარმომადგენლებთან პოლიტიკურ კონსულტაციებს მართავს.
